ކުއާޓާ ފައިނަލުން ބްރެޒިލް ކެޓީ، ޕެނަލްޓީ ޖަހައިގެން އުރުގުއޭ އަތުން ބަލިވެގެންނެވެ. އުރުގުއޭ މި މެޗު ކާމިޔާބު ކުރީ ހަތަރު ލަނޑު ދެ ލަނޑުންނެވެ. ސެމީގައި އުރުގުއޭ ކުޅޭނީ ކޮލަމްބިއާއާ ދެކޮޅަށެވެ. އަނެއް ސެމީގައި އާޖެންޓީނާ ނުކުންނާނީ ކެނެޑާއާ ދެކޮޅަށެވެ.
ރާއްޖޭ ގަޑިން މިއަދު ހެނދުނު އެމެރިކާގެ ލަސްވެގަސްގެ އެލިގަންޓް ސްޓޭޑިއަމްގައި ކުޅުނު މެޗުގެ ފުރިހަމަ ވަގުތު ހަމަވިއިރު، އުރުގުއޭ އާއި ބްރެޒިލް އޮތީ ލަނޑެއް ނުޖެހި އެއްވަރުވެފަ އެވެ. ކޮޕަ އެމެރިކާގެ މި ފަހަރުގެ ގަވާއިދުގައިވާ ގޮތުން، ފުރިހަމަ ވަގުތު ހަމަވާއިރު އެއްވަރުވެފައި އޮވެއްޖެނަމަ، އިތުރު ވަގުތުގެ ދެ ހާފް ނުކުޅެ، ނަތީޖާ ނެރޭނީ ޕެނަލްޓީންނެވެ. ޕެނަލްޓީގައި ބްރެޒިލްއަށް ކާމިޔާބު ނުވީއެވެ.
މިއީ، 13 އަހަރު ތެރޭގައި އުރުގުއޭގެ ފުރަތަމަ ސެމީ ފައިނަލް އެވެ. އެ ޓީމުން އެންމެ ފަހުން، ކޮޕަ އެމެރިކާގެ ސެމީ އަށް ދަތުރުކުރީ 2011 ވަނަ އަހަރު އެވެ. އެ ފަހަރު އެ ޓީމުން މުބާރާތް ކާމިޔާބުކުރި އެވެ.
