ވެރިކަން ހިންގާ ޕީއެންސީން މިރޭ ބޭއްވި ޖަލްސާއެއްގައި ވާހަކަ ދައްކަވަމުން ރައީސް ވިދާޅުވީ ރައްޔިތުންގެ ފައިސާއިން ވައްކަންކޮށްފައިވާ މީހުންނަށް ހަގީގީ އަދަބު ލިބިދޭންޖެހޭ ކަމަށެވެ.
ރައީސް ވިދާޅުވީ އެކަން އެންމެ ރަނގަޅަށް ކުރެވޭނީ ގާނޫނެއް ހަދައިގެން ކަމަށެވެ.
އެ ގާނޫނު ފަރުމާ ކުރާއިރު، ރާއްޖެއިން ބޭރުގައި ރައްކާކޮށްފައި ހުރި ވަގު ފައިސާ ވެސް ހޯދަން ފަސޭހަވާނެ ގޮތަކަށް ގާނޫނު ބައްޓަން ކުރައްވާނެ ކަމަށް ވެސް ރައީސް މުއިއްޒު ވިދާޅުވި އެވެ.
މީގެ އިތުރުން ރާއްޖޭގައި މިހާތަނަށް ހިންގި އެންމެ ބޮޑު ކޮރަޕްޝަންގެ މައްސަލަ ކަމަށްވާ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ހިޔާނާތުން ގެއްލުނު ފައިސާ ހޯދައި، ކުށްވެރިވާ މީހުންނަށް ހައްގު އަދަބު ދޭނެ ކަމަށް ވެސް އެމަނިކުފާނު ވިދާޅުވި އެވެ.
ރައީސް އިތުރަށް ވިދާޅުވީ، ކޮރަޕްޝަނަކީ ސަރުކާރު ތެރޭގައި އަބަދު ހިނގަ ހިނގާ އޮންނަ ކަމެއްގެ ގޮތުގައި އޮތް އޮތުން ބަދަލުކުރާނެ ކަމަށެވެ. ރައްޔިތުންގެ ފައިސާ ހޯދަން ބަލާއިރު އެންމެ ބޮޑު މައްސަލައަކީ އެމްއެމްޕީއާރްސީގެ ތެރެއިން ގެއްލިފައިވާ ފައިސާގެ މައްސަލަ ކަމަށް ރައީސް ވިދާޅުވި އެވެ.
އެހެންކަމުން އެންމެ އިސްކަމެއްދޭނެ އެއް މައްސަލައަކީ އެ ހިޔާނާތުގެ ތެރެއިން ގެއްލިފައިވާ ފައިސާ ހޯދައި، އެކަމުގައި ޝާމިލުވާ މީހުންނަށް ފިޔަވަޅު އެޅުން ކަމަށް ރައީސް ވިދާޅުވި އެވެ.
އެެހެން ނަމަވެސް ރައީސް ވިދާޅުވީ އެކަމުގައި ބައިވެރިވި މީހެއް ކަމުގައި ސާބިތުކުރެވެން ޖެހޭނީ އިންސާފުވެރިކަމާ އެކުގައި ކަމަށެވެ. އަދި އެ މީހަކު އެކަމުގައި ޝާމިލްވަނީ އެ ނިޔަތުގައި ކަމުގައި ވާނަމަ އެމީހަކަށް ފިޔަވަޅު އަޅަން ޖެހޭނެ ކަމަށް ވެސް ރައީސް ވިދާޅުވި އެވެ.
