އެމްޑީޕީގެ ނައިބު ރައީސްގެ މަގާމު ހުސްވީ މިދިޔަ އަހަރުގެ އޭޕްރީލް މަހުގެ ތެރޭގައި އެ މަގާމުގައި ހުންނެވި މުހައްމަދު ޝިފާޒު އެމްޑީޕީން ވަކިވެ ޑިމޮކްރެޓްއާ ގުޅުމުންނެވެ.
އެމްޑީޕީގެ ނައިބު ރައީސްގެ މަގާމަށް މީހަކު އައްޔަންކުރެވޭނީ އެ ޕާޓީގެ ގައުމީ މަޖިލީހުގެ މެންބަރުންގެ ރުހުން ލިބިގެންނެވެ. ހިސާން އެ މަގާމަށް އައްޔަންކުރަން ޤައުމީ މަޖިލީހުގެ ރުހުން އޮތްތޯ ބެލުމަށް ހުށައެޅުއްވީ ޕާޓީގެ ރައީސް އަބްދުﷲ ޝާހިދެވެ.
ޖުޑިޝަލް ސާވިސް ކޮމިޝަންގެ ކުރީގެ ރައީސްކަމުގައިވެސް ހުންނެވި ހިސާންގެ ނަން ނައިބު ރައީސްކަމަށް ހުށައެޅުއްވިކަން އިއުލާންކުރައްވާ ޝާހިދު އެކްސްގައި ކުރެއްވި ޕޯސްޓްގައި ވަނީ ހިސާންގެ މަސައްކަތެއް ފާހަގަކުރައްވާ އޭނާއަށް ތައުރީފުކުރައްވާފައެވެ.
ޝާހިދުގެ މި ނިންމެވުމަށް ހިސާން ވަނީ ޝުކުރު އަދާކޮށްފައެވެ. އަދި ޕާޓީގައި ހުރިހާ މެމްބަރުން އެހީތެރިކަމާއި ތާއީދު ބޭނުންވާކަމަށްވެސް ހިސާން ވަނީ ވިދާޅުވެފައެވެ.
