އެމްޑީޕީގެ ދާއިރާތަކުގެ އެތެރޭގެ އިންތިހާބުތަކުގައި ވާދަކުރުމުގެ ފުރުސަތު އެ ޕާޓީގެ ކުރީގެ ޗެއާޕާސަން ރީކޯ މޫސާ މަނިކަށް ނުދިނުމުން އެ މައްސަލަ އިލެކްޝަންސް ކޮމިޝަން އަށް ހުށަހަޅުއްވަން އޭނާ ނިންމަވައި އެވެ.
Advertisement
މޫސަ އެކްސްގައިކުރި ޕޯސްޓެއްގައި ވަނީ، އެމްޑީޕީ އިން އެމަނިކުފާނަށް މިހާވަރެއް ކުރަން މިޖެހެނީ ކޮން ސަބަބަކާހުރެތޯ ކަމަށް ބުނެ ސުވާލު އުފައްދާފަ އެވެ.
އަދި އެއްވެސް ކަމެއްގައި ބައިވެރިވުމުގެ ކުޑަވެސް ފުރުސަތެއް ނެތް ކަމަށެވެ.
"ކީކޭދެން ބުނާނީ. އެމްޑީޕީގެ ލީޑާޝިޕުން އަޅުގަނޑަށް މިހާ ވަރެއް ކުރަން މި ޖެހެނީ ކޮން ސަބަބަކާ. ހުރެތޯ؟ އެއްވެސް ކަމެއްގައި ބައިވެރިވުމުގެ ކުޑަވެސް ފުރުސަތެއް ނެތް. 2014 ގަ ޕާޓީން ކަނޑާލީ ވެސް ނަޝީދު އަށް ވެރިކަން ލިބުމުގަ ހުރަހަކަށް ވާތީކަ ން ޔަގީން މިހާރުވެސް އެ ބިރު،" މޫސަ ވިދާޅުވި އެވެ.
އެމްޑީޕީގެ އެތެރޭގެ އިންތިހާބުގައި ވާދަނުކުރެވޭނެ ކަމަށް ބުނެ، އެޕާޓީން މޫސައަށް ފޮނުވި ސިޓީގައި ބުނެފައި ވަނީ، އޭނާ އަލުން އެ ޕާޓީއަށް ވަދެވަޑައިގެންފިނަމަ، އެ ދުވަހުން ފެށިގެން ފަސް އަހަރު ދުވަހަށް ޕާޓީގެ އެއްވެސް މަގާމެއް, އެއްވެސް ޕްރައިމަރީއެއްގައި ވާދަނުކުރެވޭނެކަން ބަޔާންކޮށްފައިވެ އެވެ.
"މި ނިންމުމަށް ބަދަލެއްގެންނަން ނުފެންނަ ކަމަށް މިޕާޓީގެ އިސްތިއުނާފް ފަނޑިޔާރު މަޖިލިސް އިން ނިންމާފައިވާތީވެ މޫސާ މަނިކު މިޕާޓީއަށް ގުޅިވަޑައިގެންނެވި ދުވަސް ކަމަށްވާ 9 ނޮވެމްބަރ 2022 އިން ފެށިގެން 5 އަހަރުގެ މުއްދަތަށް މިޕާޓީގެ އެއްވެސް އިންތިހާބެއްގައި އަދި ޕްރައިމަރީއެއްގައި ބައިވެރިނުވެވޭނެތީވެ މާލޭ ސިޓީ ރައީސް ކަމަށް އެދި ހުށައެޅި ހުށައެޅުން ގަބޫކު ނުކުރާ ކަމުގައި ދެންނެވީމެވެ،" އެމްޑީޕީގެ އިންތިހާބު ކޮމިޓީން މޫސައަށް ފޮނުވި ސިޓީގައި ބުނެފައިވެ އެވެ.
މޫސާ މަނިކު އެމްޑީޕީން ވަކިކުރުމަށް އެ ޕާޓީގެ ފިޔަވަޅު އަޅާ ކޮމިޓީން ނިންމީ 22 ޑިސެމްބަރު 2014 ގަ އެވެ. ސަބަބެއް ކަމުގައި އޭރު ޕާޓީއިން ބުނީ 14 ޑިސެމްބަރު 2014 ގައި އޮތް ރައްޔިތުން މަޖިލީހުގެ ޖަލްސާގައި ނެގި ވޯޓެއްގައި ޕާޓީގެ ވިޕްލައިނާ ހިލާފުވުމެވެ.
އެ ޕާޓީއިން ބުނާގޮތުގައި މޫސަ އައް އަލުން އެމްޑީޕީ އާއި ގުޅިވަޑައިގަތް ތާރީހުން ފެށިގެން އަލުން އެމްޑީޕީގެ ޕްރައިމަރީ އެއްގައި ވާދަކުރެވޭނީ 9 ނޮވެންބަރު 2027 ގެ ފަހުންނެވެ.
