ޔުއެފާއިން، އިންގްލަންޑާ ހޮލެންޑް ކުޅޭ ޔޫރޯގެ ސެމީ ފައިނަލް މެޗަށް ހަމަ ޖައްސާފައިވަނީ 2005 ވަނަ އަހަރު މެޗް ފިކްސިން މައްސަލައެއް ސާބިތުވެ ހަ މަސް ދުވަހަށް ސަސްޕެންޑްކޮށްފައިވާ ޖަރުމަނުގެ ރެފްރީއެކެވެ. އޭނާ ކުރިން ޖަރުމަން ލީގުގައި ރެފްރީކަން ކުރި މެޗެއްގައި ހެދި ގޯސްތަކެއްގެ ސަބަބުން އޭރު ޖަރުމަންގެ ބޮރޫޝިއާ ޑޯޓްމަންޑަށް ކުޅުނު އިގިރޭސި ފޯވާޑް ޖޫޑް ބެލިންހަމް، އެ ވާހަކަ ދައްކައިގެން ޖޫރިމަނާވެސް ކޮށްފައިވެއެވެ.
އިންގްލެންޑާ ހޮލެންޑް ކުޅޭ ސެމީ ފައިނަލަށް ހަމަ ޖައްސާފައިވަނީ އުމުރުން 43 އަހަރުގެ ފެލިކްސް ޒްވާޔާ ކިޔާ ރެފްރީއެކެވެ. އެ މެޗުގައި މުޅި ރެފްރީންގެ ޓީމުގައިވެސް ތިބޭނީ ޖަރުމަން މީހުންނެވެ. ފެލިކްސް ޒްވާޔާއަކީ މެޗެއްގެ ނަތީޖާ ބަދަލު ކުރަން ޓީމެއްގެ އޮފިޝަލެއްގެ އަތުން 250 ޕައުންޑް ރިޝްވަތުގެ ގޮތުގައި ނަގާފައިވާކަން ކުރި ސާބިތުވެފައިވާ މީހެކެވެ. އެ މައްސަލައިގައި ރެފްރީ ހަ މަސް ދުވަހަށް ސަސްޕެންޑް ކުރިއިރު، އެ އޮފިޝަލްވަނީ އުމުރަށް ސަސްޕެންޑްކޮށްފައެވެ.
މެޗު ފިކްސިން މައްސަލައެއް ސާބިތުވެ އަދަބު ދީފައިވާ މީހަކަށް، ޔޫރޯގެ ބޮޑު މެޗެއްގައި ރެފްރީކަން ކުރަން ފުރުސަތު ދިނުމުން ގިނަ ބަޔަކު އަންނަނީ އެކަމާ ފާޑު ކިޔަމުންނެވެ. އަދި ހުޅަނގުގެ މީޑިއާގައިވެސް މިކަން އަންނަނީ ފާހަގަ ކުރަމުންނެވެ.
