ލޯކަލް ގަވަރމެންޓް މިނިސްޓަރަ އާދަމް ޝަރީފް އުމަރު އެކްގައި ކުރެއްވި ޕޯސްޓެއްގައި ވަނީ މަގު ބައްތިތައް ހަދިޔާކުރުމުން ޗައިނާގެ ސަރުކާރަށް ޝުކުރު ދަންނަވާފަ އެވެ.
މިނިސްޓަރ ވިދާޅުވީ، މި ފަދަ އެހީއެއް ޗައިނާ ސަރުކާރުން ވުމަކީ ދެމެހެއްޓެނިވި މަސައްކަތަށް ލިބުނު ވަރަށް ބޮޑު ކުރިއެރުމެއް ކަމަށާޢި، މިކަމުގެ ސަބަބުން އެންގިގެންދަނީ ދެ ގައުމުގެ ގުޅުން ބަދަހިވަމުންދާ ކަމުގެ ހެކިތަކެއް ކަމަށެވެ.
މިނިސްޓަރު ވަނީ، މަގުބައްތި ހަރުކުރުން ހަވާލުކުރުމުގެ ރަސްމިއްޔާތަށް ހިންމަފުށީ ކައުންސިލާއި ދިވެހި ރައްޔިތުން ދެއްވި އިންތިޒާމުތަކާއި ހޫނު މަރުހަބާއަށްޓަކައި ޝުކުރު އަދާކޮށްފަ އެވެ.
މި މަސައްކަތާއި ގުޅޭގޮތުން ހިންމަފުށި ކައުންސިލްގެ ރައީސް ހަސަން ފާއިޒު ވިދާޅުވީ މި މަޝްރޫޢުއާއެކު، މަގު ބައްތިތައް ދިއްލުމަށް ކައުންސިލުން ކުރަމުން އައި ހޭދައަށް ބޮޑު ލުޔެއް ލިބޭނެކަމަށެވެ.
މަގު ބައްތިތައް ޖަހާ ނިމި، ހިދުމަތް ދޭން ފެށުމަށް ބޭއްވި ރަސްމިއްޔާތުގައި ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވާންގް ލިޒިންވެސް ބައިވެރިވެވަޑައިގެން ވާހަކަފުޅު ދެއްކެވި އެވެ. އެކަމަނާ ވިދާޅުވީ، މި އެހީއަކީ ޗައިނާގެ ޔުނާން ޕްރޮވިންސްގެ އެހީއެއްކަމަށެވެ. ކުދި އާބަދީތަކުގެ ކުރިއެރުމަށް ބޭނުންވާ، ޒަމާނަށް ފެތޭ އެހީތެރިކަން ރާއްޖެއަށް ފޯރުކޮށްދިނުމުގައި ޗައިނާއިން އަބަދުވެސް އެހީތެރިކަން ދޭނެކަމަށް ސަފީރު ވިދާޅުވި އެވެ.
