މިނިސްޓަރު މިހެން ވިދާޅުވީ ދަ ނޭޝަނަލް ހައި ލެވެލް ކޮންފަރެންސް އޮން ޕީސް އެންޑް ސެކިއުރިޓީ ފެށުމަށް ބާއްވި ރަސްމިއްޔާތުގައި ވާހަކަ ދައްކަވަމުންނެވެ.
ގައްސާން ވިދާޅުވީ ގައުމުތަކަށް ދިމާވާ ސަލާމަތީ ގޮންޖެހުންތައް ލިސްޓްކޮށްފިނަމަ ނިރުބަވެރިކަމާ އެކަމަށް މަގުފަހިކޮށްދޭ އަމަލުތަައް އެންމެ މަތީގައި މިހާރި ލިސްޓްކުރެވޭނެކަމަށެވެ. އަދި ވަރަށް ހާމަކަން ބޮޑު ގޮތެއްގައި އެ ފަދަ ނިރުބަވެރިކަމުގެ ތެރެއަށް އާ މީހުން ލެންބެވުމުގެ މަސައްކަތް ކުރަމުންދާކަން އެންމެން ވެސް ދަންނަ ކަމަށް މިނިސްޓަރު ވިދާޅުވިއެވެ. މާލޭގެ އިތުރުން އަތޮޅުތެރޭގައި ވެސް މި ފަދަ ހަމަލާތައް ދީފައިވާ ކަމަށް މިނިސްޓަރުވަނީ ވިދާޅުވެފަ އެވެ.
އަތޮޅު ތެރޭގައާއި މާލޭގައި އެންމެންގެ ކުރިމަތީގައި އެފަދަ އަމަލުތަކާއި ހަމަލާތައް ދީގެން، ފަހަކަށް އައިސް ރައްޔިތުން އާންމު ހާލަތުގައި ބޭނުން ކުރާ ޓެކްނޮލޮޖީއާ ވަސީލަތްތަކާއި، ޕްލެޓްފޯމްތައް ބޭނުންކޮށްގެން އާ މީހުން އެފަދަ ނުރައްކާތެރި ހަރަކާތްތަކުގެ ތެރެއަށް ވެއްދުމުގެ މަސައްކަތްތައް ފަށާފައިވާކަން ވަރަށް ބޮޑަށް ފާހަގަކުރެވޭކަމަށް ގައްސާން ވިދާޅުވި އެވެ.
މިއީ ޤައުމީ ސަލާމަތަށް އޮތް ނުރައްކާ އަދި ހައްސާސް މައްސަލައެއްކަން ފާހަގަކުރައްވާ އޭނާ ވިދާޅުވީ މި ނުރައްކާތެރި ވަބާއިން ސަލާމަތްވުމަށްޓަކައި ދައުލަތުގެ 3 ބާރު، ސަރުކާރުގެ ހުރިހާ އިދާރާއްކާއި އަމިއްލަ ހުރިހާ ޖަމިއްޔާއާ ޖަމާއަތްތަކާއި އެއްކޮށް އެކަތިގަނޑެއްހެން މަސައްކަތްކުރަން ޖެހިފައިވާކަމަށް ވެސް ގައްސާން ވިދާޅުވި އެވެ.
މިނިސްޓަރު ވިދާޅުވީ ޓެރަރިޒަމްގެ އަަމަލުތައް ހުއްޓުވުމަށް ހުރި ގޮންޖެހުންތައް ކުރިޔަށްވުރެ ބޮޑު ކަމަށެވެ. އެހެން ނަމަވެސް އެ ކަން ހުއްޓުވުމަށް ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ގިނަ މަސައްކަތްތަކެއް ކުރެވެމުން އަންނަ ކަމަށް މިނިސްޓަރު ވަނީ ވިދާޅުވެފަ އެވެ.
ދަ ނޭޝަނަލް ހައި ލެވެލް ކޮންފަރެންސް އޮން ޕީސް އެންޑް ސެކިޔުރިޓީއަކީ ނެޝަނަލް ކައުންޓަރ ޓެރޮރިޒަމް ސެންޓަރާއި ލައިން އެޖެންސީތަކުން ސަރުކާރުގެ އިސްވެރިންނާއެކު ޓެރަރިޒަމް ހުއްޓުވުމަށާއި ޓެރަރިޒަމަށް މަގުފަހިވާ އަނިޔާވެރި ހައްދުފަހަނައަޅާ ދިއުމާ ދެކޮޅަށް މަސައްކަތްތަކެއް ކުރުމުގައި އިސްކަންދޭ ކަންތައްތަކާއި ސިޔާސަތުތައް ކުރިއެރުވުމަށްޓަކައި މަޝްވަރާކޮށް މަޢޫލޫމާތު ބަދަލުކުރުމަށް އެހީތެރިވެދިނުމުގެ މަގުސަދުގައި ބާއްވާ ކޮންފަރެންސެކެވެ.
