އާރްޓީއެލްގެ ހިދުމަތް ނ. އަތޮޅުގައި ފެށުމާއި ގުޅޭ ގޮތުން ޓްރާންސްޕޯޓް މިނިސްޓްރީގެ އޮފިޝަލަކު ވިދާޅުވި ގޮތުގައި އެ އަތޮޅުގައި ފެރީގެ ހިދުމަތުގައި ބޭނުންކުރާނީ 50 މީހުންގެ ޖާގައިގެ ދެ ފެރީ އެވެ. އަދި މި ދަތުރުތައް ފެށުމަށް ޓެސްޓު ބުރު އިއްޔެ ވަނީ ބާއްވާފަ އެވެ.
އާރްޓީއެލް ފެރީގެ ހިދުމަތް މިއަހަރުގެ އޮގަސްޓް މަހު ރ. އަތޮޅުގައި އަދި ސެޕްޓެމްބަރު މަހު ބ. އަތޮޅުގައި ފަށާނެ ކަމަށް ޓްރާންސްޕޯޓް މިނިސްޓްރީން މީގެ ކުރިން ވަނީ ބުނެފަ އެވެ.
ދަތުރުފަތުރުގެ ގޮތުން ރާއްޖެ ގުޅުވާލަން ކުރީ ސަރުކާރުން ފެށި އާރްޓީއެލް ފެރީގެ ހިދުމަތް މިހާރު ކުރިއަށްގެންދަނީ ހއ. އަތޮޅާއި ހދ، ށ، ޅ، ގއ، ގދ އަތޮޅުގެ އިތުރުން އައްޑޫ ސިޓީއާއި ފުވައްމުލަކު ސިޓީގައެވެ.
އާރްޓީއެލް ފެރީގެ ހިދުމަތް ގުޅޭގޮތުން ޓްރާންސްޕޯޓު މިނިސްޓަރު އަމީން މިފަހުން ވިދާޅުވީ މި މަސައްކަތް ކުރީ ސަރުކާރުގައި ފެށިފައި އޮތް ނަމަވެސް ފެށިފައި އޮތީ އެންމެ ރަނގަޅަށް އިންތިޒާމު ކުރެވިގެން ނޫން ކަމަށެވެ.
އެގޮތުން، މިހާރު ރޫޓުތައް ހުރީ ވެސް ރައްޔިތުން އެންމެ ބޭނުންވާގޮތަށް ނޫންކަން އޭނާ ވަނީ ފާހަގަކުރައްވައިފަ އެވެ. އަދި, މިހާރު އެ މަސައްކަތް ފަށާފައިވާ ކަމަށާއި ކުރިއަށް އޮތް ދޮޅުމަސްތެރޭ ވަރަށް ގިނަ ބަދަލުތަކެއް އަންނާނެކަން މިނިސްޓަރު ވަނީ ފާހަގަކުރައްވައިފަ އެވެ.
