ހަރަދު ކުޑަކުރުމުގެ ގޮތުން އަޅަން ނިންމާފައިވާ ފިޔަވަޅުތަކާ ގުޅޭ ގޮތުން ޖޭއެސްސީން، ޑީޖޭއޭއަށް އަންގާފައިވަނީ ރާއްޖޭގެ މިވަގުތުގެ އިގުތިސާދީ ހާލަތަށް ރިއާޔަތްކޮށް ދައުލަތުގެ ހަރަދުތައް ކުޑަކުރަން ރައީސް އޮފީހުން އަންގާފައި ވާތީ އެކަން ތަންފީޒުކުރަން ނިންމާފައިވާ ކަމަށެވެ.
ހަރަދު ކުޑަ ކުރަން ޖޭއެސްސީން ރިކަރަންޓް ހަރަދުތައް ކުޑަކޮށް ފިޔަވަޅުތަކެއް އަޅަން ނިންމީ މިދިޔަ ހޯމަ ދުވަހު ބޭއްވި އެ ކޮމިޝަންގެ ޖަލްސާގައި ކަމަށްވަނީ މައުލޫމާތު ލިބިފައެވެ. އެ ފިޔަވަޅުތައް އެޅުމަށްޓަކައި އެ ކޮމިޝަނުންނާއި ޑިޕާޓްމަޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖީއޭ) އިން މި އަހަރު ކުރަން ރާވާފައިވާ ކަންތައްތަކަށް ރިއާޔަތްކޮށްފައިވާނެ މައުލޫމާތު ލިބިފައިވެ އެވެ.
ހަރަދު ކުޑަކުރުމުގެ ގޮތުން ކޮމިޝަނުން އަޅަން ނިންމި ފިޔަވަޅުތަކުގެ ތެރޭގައި ބޭރުގެ ފަރާތްތަކުގެ އެހީގައި ހިންގާ ޓްރޭނިން ޕްރޮގްރާމްތައް ފިޔަވައި އެހެނިހެން ޕްރޮގްރާމްތައް ހިންގުން މަޑުޖައްސާލުމާއި އިތުރުގަޑީގައި ކޮންމެހެން ނުކުމެ ކުރަން ޖެހޭ މަސައްކަތްތައް، ސުޕަވައިޒަރުގެ ހާއްސަ ހުއްދާ އެކު ކުރުމާއި ސުޕަވައިޒަރުން އިތުރުގަޑި މޮނިޓާކުރުން އަދި އާ މުވައްޒަފުންނާއި ފަނޑިޔާރުން ނެގުމުގެ މަސައްކަތް މަޑުޖައްސާލުމުގެ އިތުރުން އާ ކޯޓު ހުޅުވުމުގެ ރަސްމިއްޔާތުތައް މިވަގުތަށް ނުބޭއްވުން ހިމެނެއެވެ. މީގެ އިތުރުން މުސާރަ އާއި އިނާޔަތް ލިބޭ ގޮތަށް ފަނޑިޔާރުން ދިގު މުއްދަތުގެ ކޯސްތަކަށް ވީއްލުން މަޑުޖައްސާލުމަށްވެސް ޖޭއެސްސީންވަނީ ނިންމާފަ އެވެ.
ރާއްޖޭގެ އިގުތިސާދީ އަދި މާލީ ހާލަތު ހުރި ގޮތުން، ސަރުކާރުން ވަނީ ދައުލަތުގެ ހަރަދު ކުޑަކުރުމަށްޓަކައި ގިނަ ފިޔަވަޅުތަކެއް އަޅަން ނިންމައިފަ އެވެ. ބައެއް ކަންކަން މިހާރު ވަނީ ތަންފީޒުކުރަން ވެސް ފަށައިފަ އެވެ. އޭގެ ތެރޭގައި، ސިޔާސީ މަގާމުތަކުގެ އަދަދު މަދުކުރުމާއި އެކިއެކި މުނާސަބަތުތަކުގައި ބާއްވާ ހަފުލާތަކުގެ ހަރަދުތައް ކުޑަކުރުން ނުވަތަ ނުބޭއްވުމަށް ވެސް ހިމެނެ އެވެ.
