ރޭ ޕީއެންއެފުން ބޭއްވި ޖަލްސާގައި މި ސަރުކާރަށްް ފާޑު ވިދާޅުވަމުން ރައީސް ޔާމީން ވިދާޅުވީ މި ސަރުކާރުން ދައްކާ ވާހަކަ ދިމާނުވާކަމަށާއި ކުރަނީ ބޭކާރު ހަރަދުތައްކަމަށެވެ. ދައުލަތުގެ ބަޖެޓްގައި ފައިސާ ނެތްކަމަށް ބުނެ ސަރުކާރުގެ އިސްވެރިން ބޮޑެތި ހަރަދުތައް ކުރަމުންދާކަމަށް ތުހުމަތު ކުރައްވާފައެވެ.
އެގޮތުން އީދު ފާހަގަ ކުރަން މުޅި ރާއްޖޭގައި ކުލަބޮކި ދިއްލައި ބޮޑެތި ހަރަދުތަކެއް ސަރުކާރުން ކޮށްފައިވާތީ އެކަމަށް ފާޑު ވިދާޅުވަމުން، އެ ހަރަދުތައް އަނބުރާ ހޯދަން ކަރަންޓް ބިލުތައް ބޮޑުކޮށްފައިވާ ކަމަށް ރައީސް ޔާމީން ތުހުމަތު ކުރެއްވިއެވެ.
ޔާމީން ވިދާޅުވީ ރިޔާސީ އިންތިހާބުގެ ދުވަސްވަރު މި ސަރުކާރުގެ ވެރިން މުޅިންހެންވެސް ވިދާޅުވަމުން ގެންދެވީ ދައުލަތް ހިންގުމަށް އެކު ފަރާތްތަކުން ފައިސާ ހަމަޖެހިފައިވާ ވާހަކަކަމަށެވެ. އެހެންނަނަމަވެސް ވެރިކަމާއި ހަވާލުވެ މިހާރު ފައިސާ ނެތްކަމަށް ވާހަކަ ދައްކާތީ ރައީސް ޔާމީން ވަނީ ޑރ. މުއިއްޒު ކެމްޕެއިންގައި ދެއްކެވި ވާހަކަތައް ދައްކަވަމުން ސަރުކާރަށް ފާޑު ވިދާޅުވެފައެވެ.
ރައީސް ޔާމީން ވިދާޅުވީ މި ސަރުކާރުން ބޭކާރު ހަރަދުތައް ކުރާކަމަށެވެ. އެގޮތުން ނިމިދިޔަ ދެ ދައުރަށްވުރެ ވެސް މި ދައުރުގައި ސިޔާސީ މަގާމުތައް ގިނަކަމަށް ވިދަޅުވިއެވެ. މި ސަރުކާރުގެ ސިޔާދސީ މަގާމުތައް 2000 ގާތްކުރާކަން ޔާމީން ވިދާޅުވިއެވެ.
ވެރިކަމާ ހަވާލުވެ ސަރުކާރުން ކޮށްފައިވާ ބައެއް ހަރަދުތަކަކީ މާލީ ހާލަތާ ނުބައްދަލު ހަރަދުތަކެއްގެ ގޮތުގައި ޔާމީން ސިފަކުރެއްވިއެވެ. އޭގެ ތެރޭގައި, ރަސްމާލެ މަޝްރޫއު އާއި ޑްރޯން ގަތުމާއި އަދިވެސް ބައެއް އެހެނިހެން ކަންކަމަށް ކުރި ހަރަދު ރައީސް ޔާމީން ފާހަގަކުރެއްވިއެވެ.
ރށާއްޖޭގެ މާލީ ހާކަތު ގޯސްކަމަށް ސަރުކާރުން ބުނެ އެކަންކަން ރައްޔިތުންނަށް ހާމަ ނުކުރާތީއާ ސަރުކާރާއި ގުޅުން ހުރިކަންކަން ހާމަކުރަން ދެކޮޅު ހަދަމުންގެންދާތީ މީ ސިއްރު ދައުލަތެއް ކަމަށް ރައީސް އަބްދުالله ޔާމީން ސިފަކުރެއްވިއެވެ.
