ވެރިކަން ކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ހަރުގެ ޖަލްސާގައި ރޭ ވާހަކަފުޅުދައްކަވަމުން ޝުޖާއު ވިދާޅުވީ، މީގެ ކުރިން ރާއްޖެއަށް އަންނަންހުރި ބޮޑެތި މަޝްރޫއުތައް އެމްޑީޕީން މުޒާހަރާކޮށްގެން ހުއްޓުވާފައިވާ ކަމަށާއި، މާޒީގައި ކުރެވުނު އެ ތަޖުރިބާއަށް ބަލައި ރާއްޖޭގައި ކުރިއަށްދާ މަޝްރޫއުތައް މުޒާހަރާކޮށްގެން ދެން ނުހުއްޓުވޭނެ ކަމަށެވެ.
ޝުޖާއު ވިދާޅުވީ، ހދ. ކުޅުދުއްފުށި އެއާޕޯޓު ތަރައްގީ ކުރުމުގެ މަސައްކަތް ފެށުމުން އެ ރަށުގައި ތިބި ބަޔަކު ލައްވައި ކުޅި ހިމާޔަތް ކުރުމުގެ މުޒާހަރާ ކުރެއްވި ކަމަށާއި، ބްރިޖުގެ މަޝްރޫއާ އެކު ރާޅުގަނޑުގައި ރާޅާ އަޅަން އުޅުނު ކުދިން ލައްވާ ވެސް އެމްޑީޕީން މުޒާހަރާ ކުރުވި ކަމަށެވެ.
އެގޮތުން، ރައީސް ޑރ. މުހައްމަދު މުއިއްޒުގެ ސަރުކާރުން ވ. އަތޮޅުގައި ފަތުރުވެރިކަމުގެ ބޮޑު މަޝްރޫއެއް ފެށުމުން އެކަމަށް ހުރަސް އަޅަން އެމްޑީޕީން މަސައްކަތް ކުރަމުން އަންނަކަން ފާހަގަކުރައްވާ ޝުޖާއު ވަނީ އެކަން ހުއްޓާލުމަށް ގޮވާލައްވާފަ އެވެ.
ޝުޖާއު އިތުރަށް ވިދާޅުވީ، އެފަދަ ކަންކަމަށް ހިތްވަރުދޭ މީހުންނާ މެދު ފިޔަވަޅު އަޅުއްވާނެ ކަމަށާއި، އެއީ ކޮންމެ މީހަކަށް ވީނަމަވެސް ގާނޫނީ އިމުގެ ތެރެއިން އެމީހަކަށް ދޭންޖެހޭ ހައްގުއަދަބު ދިނުމަށް މި ސަރުކާރުން ފަސް ނުޖެހޭނެ ކަމަށެވެ.
