ޔުއެފާއިން، އާދީއްތަ ދުވަހު ބާލިންގައި ބާއްވާ ޔޫރަޕިއަން ޗެމްޕިއަންޝިޕް ފައިނަލްގައި ސްޕެއިން އާއި އިންގްލެންޑް ބައްދަލުކުރާ މެޗުގައި ރެފްރީކަން ކުރަން ހަމަ ޖައްސާފައިވަނީ ފްރާންސްގެ ފްރާންސުއާ ލެޓެކްސިއާ ނަމަކަށް ކިޔާ ތަޖުރިބާކާރު ރެފްރީއެކެވެ.
އުމުރުން 35 އަހަރުގެ ލެޓެކްސިއާ ވަނީ 2017 ވަނަ އަހަރުން ފެށިގެން ޔޫއެފާގެ ރަސްމީ 65 މެޗުގެ ރެފްރީކަން ކޮށްފައެވެ. އޭގެ ތެރޭގައި މިހާރު ހިނގަމުންދާ ޔޫރޯގެ ގްރޫޕް ސްޓޭޖުގައި ސްޕެއިން އާއި ޖޯޖިއާ ކުޅުނު މެޗާ، ޑެންމާކާއި ސާބިއާ އަދި ކްރޮއޭޝިއާ އާއި އަލްބޭނިއާ ބައްދަލުކުރި މެޗު ހިމެނެ އެވެ.
ލެޓެކްސިއާ ވަނީ މިދިޔަ ސީޒަންގެ ޗެމްޕިއަންސް ލީގު ފައިނަލުގައި ރެއާލް މެޑްރިޑުން ބޮރޫޝިއާ ޑޯޓްމަންޑް ބަލިކުރި މެޗުގެ ހަތަރު ވަނަ އޮފިޝަލް ކަންވެސް ކޮށްފައެވެ.
ފައިނަލް މެޗުގައި ލެޓެކްސިއާގެ ޓީމުގައި ހިމެނޭނީ ފްރާންސްގެ އެސިސްޓެންޓުން ކަމަށްވާ ސައިރިލް މުގްނިއާ އާއި މެހްދީ ރަހްމޫނީ އަދި ހަތަރު ވަނަ އޮފިޝަލަކަށް ޕޮލެންޑްގެ ޝިމޯން މާސިނިއާކްއެވެ. ފައިނަލް މެޗުގެ ވީޑިއޯ އެސިސްޓެންޓް ރެފްރީގެ މަގާމު ހަވާލުކޮށްފައިވަނީ ފްރާންސްގެ ޖެރޯމް ބްރިސާޑް އަދި ވިލީ ޑެލަޖޯޑްގެ އިތުރުން އިޓަލީ މަސިމިލިއާނޯ އިރާޓީ އާއެވެ.
