މި ޕްރޮގްރާމަކީ މިނިސްޓްރީގެ އިތުރުން މޯލްޑިވްސް ނެޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމްއެންއެސްޑީއޭ) އަދި މޯލްޑިވްސް ޕޮލިޓެކްނިކްއާ ގުޅިގެން ގައުމީ ފެންވަރުގައި ކުރިއަށްގެންދާ ޕްރޮގްރާމެކެވެ.
މި ޕްރޮގްރާމް ކުރިއަށް ގެންދިޔުމަށް ހަމަޖެހިފައި ވަނީ ތިލަފުށީގައި ހިންގަމުންދާ ލިއޯގެ ވޯކް ސައިޓުތަކުގަ އެވެ. މިދިޔަ ބުދަ ދުވަހު ހަޔާ އެޑިއުކޭޝަން މިނިސްޓްރީއާއި، ޕޮލިޓެކްނިކް އަދި އެމްއެންއެސްޑީއޭއިން ވަނީ އެ ވޯކް ސައިޓްތައް ބަލާލުމަށް ޒިޔާރާތްކޮށްފައެވެ.
އެ ސައިޓުތަކަށް ކުރެވުނު ޒިޔާރަތުގައި ހަޔާ އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އަހުމަދު ޝަފީއު ވިދާޅުވީ، ގައުމަށް ބޭނުންވާ ބޮޑެތި މެގަ ޕްރޮޖެކްޓްތައް ހިންގުމަށް ބޭނުންވާ ފެސިލިޓީސްއާއި މެޝިނަރީގެ އިތުރުން ހުރިހާ ރޭންޖެއްގެ ވެސެލްސް ލިއޯގައި އެބަ ހުރިކަމަށެވެ.
ލިއޯގެ އިސް ފަރާތްތަކާއި ހަޔާ އެޑިއުކޭޝަންގެ އިސްވެރިން ތިލަފުށީގައި މަޝްވަރާ ކުރަނީ - ފޮޓޯ: ލިއޯ
މި ކަމާއި ގުޅިގެން ލިއޯގެ މެނޭޖިން ޑިރެކްޓަރު އަބްދުﷲ ސަވާދު ވިދާޅުވީ ލިއޯއަކީ އަބަދުވެސް ދިވެހި ޒުވާނުންނަށް ފުރުސަތުތައް ހޯދައިދީ ތަމްރީނު ޕްރޮގްރާމްތައް ހޯދައިދޭ ކުންފުންޏެއް ކަމަށާއި ސަރުކާރުގެ މުއައްސަސާތަކާއި ގުޅިގެން ދިވެހިންނަށް ރަނގަޅު އުޖޫރަ ލިބޭނެފަދަ ގިނަ ވަޒީފާތަކެއް އުފައްދައި އޭގެ ހެޔޮ މަންފާ ދިވެހި މުޖުތަމަޢަށް ކުރާނެ ގޮތެއްގެ މަތިން ވިޔަފާރި ކުރިއެރުވުމަށް ގަދައަޅައި މަސައްކަތްކުރާ ކުންފުންޏެއް ކަމަށެެވެ.
ލިއޯ އަކީ އަބަދުވެސް ސަރުކާރުގެ ކަމާގުޅޭ މުއައްސަސާތަކާއި ވަރަށް ބޮޑަށް ގުޅިގެން ދިވެހިންނަށް ރަނގަޅު އުޖޫރަ ލިބޭނެ ފަދަ ގިނަ ވަޒީފާތަކެއް އުފައްދައި އޭގެ ހެޔޮ މަންފާ ދިވެހި މުޖުތަމައަށް ކުރާނެ ގޮތެއްގެ މަތިން ވިޔަފާރި ކުރިއެރުވުމަށް ގަދައަޅައި މަސައްކަތް ކުރާ ކުންފުންޏެއް ކަމަށް ވެސް ސަވާދު ވިދާޅުވި އެވެ.
ލިއޯއިން ބުނީ މި ވޯކްޝޮޕާއެކު ސެޓްފިކެޓް ފެންވަރަށް ތަމްރީން ޕްރޮގްރާމްތައް ހިންގޭނެ ކަމަށެވެ. އަދި ލިއޯގެ އިންޓަނޭޝަނަލް ޕާޓްނަރުންގެ ޚާއްސަ ޓެކްނިކަލް ލައިސެންސްތައް ދޫކުރެވޭ ގޮތަށް ޓްރެއިނިން އިންސްޓިޓިއުޓެއް ވެސް ގާއިމްކުރުމަށް ނިންމާފައިވާ ކަމަށް އެ ކުންފުނިން ބުންޏެވެ.
ހަޔާ އެޑިއުކޭޝަން މިނިސްޓްރީ، އެމްއެންއެސްޑީއޭ އަދި މޯލްޑިވްސް ޕޮލިޓެކްނިކްއިން ލިއޯގެ ތިލަފުށީ ސައިޓަށް ކުރި ޒިޔާރާތުގެ ތެރެއިން -- ފޮޓޯ: ލިއޯ
ރާއްޖޭގައި އަމިއްލަ ފަރާތަކުން މިހާތަނަށް ހަދާ އެންމެ ބޮޑު ޓްރެއިނިން ފެސިލިޓީ ލިއޯއިން އަންނަނީ ގާއިމްކުރަމުންނެވެ. އެގޮތުން ތިލަފުށީގައި 43،000 އަކަފޫޓުގެ ސަރަހައްދެއްގައި ކޮމާޝަލް ޓްރެއިނިން އިންސްޓިޓިއުޝަނެއް އަންނަނީ އަޅަމުންނެވެ.
އެ ކުންފުނިން ބުނީ ޓްރެއިނިން އިންސްޓިޓިއުޓާއެކު ކިޔަވާ ދަރިވަރުންނަށް ހާއްސަ އެކޮމޮޑޭޝަން ފެސިލިޓީ - ލިއޯ ހޯމް ވެސް ގާއިމްކުރެވިގެންދާނެ ކަމަށެވެ.
