ފުޓްބޯޅައިގެ ލެޖެންޑް ޕެލޭގެ 66 އަހަރުވީ ރެކޯޑް މުގުރާލައިފިއެވެ. އޭނާ މިއަދު ހާސިލު ކުރަމުން އެދަނީ މެސީ އާއި ކްރިސްޓިއާނޯ ރޮނާލްޑޯ އެ އުމުރުގައި ހުވަފެނުގައި ނުދެކޭނެ ފަދަ ކާމިޔާބީތަކެވެ.
ޔޫރޯގައި ކުޅުނު އެންމެ ޒުވާން ކުޅުންތެރިޔާގެ ރެކޯޑް ހަދައިފިއެވެ. ޔޫރޯގައި އެސިސްޓްކުރި އެންމެ ޒުވާން ކުޅުންތެރިޔާގެ ރެކޯޑް ހަދައިފިއެވެ. ޔޫރޯގައި ލަނޑު ޖެހި އެންމެ ޒުވާން ކުޅުންތެރިޔާގެ ރެކޯޑްވެސް ހަދައިފިއެވެ. އެ ރެކޯޑްތައް މުގުރާލަނީ އެކަންޏެއްވެސް ނޫނެވެ. އެއިން ކޮންމެ ރިކޯޑެއް ހަދަނީ ނިކަން ފެންވަރުގައެވެ. ސްޓައިލުގައެވެ.
އުމުރުން 17 އަހަރުގެ ޔަމާލް މިރޭ ނުކުންނާނީ އަނެއްކާވެސް އިތުރު ރެކޯޑެއް ހެދުމަށެވެ. ޔޫރޯގެ ތަށި ހޯދާ އެންމެ ޒުވާން ކުޅުންތެރިޔާގެ ރެކޯޑް ހޯދުމުގެ ފުރުސަތު އޭނާއަށް އެބައޮތެވެ.
މިހުރިހާ ރެކޯޑްތަކެއް މިހެން ހުރުމުން ސުވާލަކީ، ޔޫރޯގެ ފައިނަލްގެ ތަރިއަކަށް ވެގެންދާނީ އުމުރުން އެންމެ 17 އަހަރުގެ ޔަމާލް ހެއްޔެވެ؟
