މިއަދު ހެނދުނު އެމެރިކާގައި ކުޅުނު ފައިނަލް މެޗުން އާޖެންޓީނާ މޮޅުވީ، ކޮލަމްބިއާ އަތުންނެވެ. އިތުރު ވަގުތުގެ ދެ ވަނަ ހާފުގައި އާޖެންޓީނާ މޮޅުވި ލަނޑު ޖަހައިދިނީ ލައުޓާރޯ މާޓިނޭޒްއެވެ.
މިއީ ކޮޕަ އެމެރިކާގެ އެންމެ ކާމިޔާބު ޓީމު، އާޖެންޓީނާ އިން މި މުބާރާތު ކާމިޔާބު ކުރި 16 ވަނަ ފަހަރެވެ. މިއަދު ހެނދުނު ކުޅުނު މި މމެޗުގެ ދެ ވަނަ ހާފުގެ 66 ވަނަ މިނެޓުގައި އާޖެންޓީނާގެ ތަރި މެސީގެ ކުޑަ ހުޅަށް ލިބުނު އަނިޔާ އަކާ ގުޅިގެން އޭނާ ވަނީ ބަދަލުކޮށްފަ އެވެ. ބެންޗުގައި އިނދެގެން މެސީ ވަރަށް ގިނައިން ރުއި މަންޒަރު ފެނިފައިވެއެވެ.
މި ކާމިޔާބީއާ އެކު އާޖެންޓީނާ އިން ވަނީ އެންމެ ފަހުން އެ ޓީމުން ކުޅުނު ބޮޑު ތިން މުބާރާތް ކާމިޔާބު ކޮށްފަ އެވެ. އެއީ 2021 ވަނަ އަހަރުގެ ކޮޕަ އެމެރިކާ ފުޓުބޯޅަ މުބާރާތާއި, 2022 ވަނަ އަހަރު ގަތަރުގައި ބޭއްވި ވޯލްޑް ކަޕްގެ އިތުރުން މި ފަހަރުގެ ކޮޕަ އެމެރިކާ މުބާރާތެވެ.
