ޕީސީބީން ބުނީ މިފްކޯގެ ސީއީއޯ/މެނޭޖިން ޑިރެކްޓަރުގެ މަގާމަށް ކުރިމަތިލާން ހުޅުވާލި ފުރުސަތުގައި ޝަރުތު ހަމަވާ އެއްވެސް މީހަކު ކުރިމަތިލާފައި ނުވާތީ އެ އިއުލާން ބާތިލުކޮށްފައިވާކަމަށެވެ.
މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)ގެ ސީއީއޯގެ މަގާމަށް ކުރިމަތިލާން ހުޅުވާލި އިއުލާން ޕީސީބީން ބާތިލު މިކުރީ އެމަގާމަށްް އާތިފް ޝަކޫރު ކުރިމަތިލައްވައިފައި ވަނިކޮށެވެ.
މިފްކޯއާ އެމްޓީސީސީ ހިންގުމުގައި ގިނަ އަހަރުތަކަކު މަސައްކަތް ކުރެއްވި އާތިފް ވިދާޅުވީ އެ މަގާމަށްް ކުރިމަތިލެއްވީ މިފްކޯގެ ހާލަތު ރަނގަޅު ކުރުމުގެ ވިސްނުމުގައިކަމަށެވެ.
މިފްކޯގެ ސީއީއޯގެ މަގާމަށް ކުރިމަތިލާ ފަރާތްތަކަކީ މަދުވެގެން 8 އަހަރު މަސްވެރިކަމާއި ގުޅުންހުރި ކުންފުންޏެއް ހިންގުމުގެ ތަޖުރިބާ ހުރި ފަރާތަކަށް ވާން ޖެހެއެވެ. އަދި އެފަރާތަކީ މަދުވެގެން 4 އަހަރު މަސްވެރިކަމާއި ގުޅުން ހުރި ބައިނަލް އަގުވާމީ ކުންފުންޏެއް ހިންގުމުގެ ތަޖުރިބާވެސް ހުރި ފަރާތަކަށް ވާން ޖެހޭ ކަމަށް ޕީސީބީން ކުރި އިއުލާންގައިވެއެވެ.
މިފްކޯގެ ސީއީއޯގެ މަގާމަށް ހޮވޭ ބޭފުޅެއްގެ ގާބިލްކަމަށް ބެލުމަށްފަހު 9،500 ޑޮލަރު (146،000 ރުފިޔާ) އާއި 12،000 ޑޮލަރު (185،000 ރުފިޔާ)އާ ދެމެދުގެ މުސާރައެއް ދިނުމަށް ޕީސީބީ އިން ވަނީ ނިންމާފަ އެވެ.
