ބަޔާން މިއުނިކަށް ކުޅެމުން އަންނަ ޖަރުމަނުގެ ފޯވާޑް، ތޯމަސް މުލާ ގައުމީ ޓީމަށް ކުޅުން މި ހުއްޓާލީ، ޔޫރޯގައި ޖަރުމަނަށް ލިބުނު ބޮޑު ނާކާމިޔާބީއާވެސް އެކުގައެވެ. އުމުރުން 34 ގައި މުލާ ގައުމީ ޓީމަށް ކުޅުން ހުއްޓާލީ 14 އަހަރު ޖަރުމަނުގެ ގައުމީ ޓީމަށް ކުޅުމަށް ފަހުއެވެ.
ޖަރުމަނު ގައުމީ ޓީމަށް 2010 ވަނަ އަހަރު ކުޅެން ފެށި މުލާ ވަނީ އެ ޓީމަށް ކުޅެދިން، 131 މެޗުގައި 45 ލަނޑުޖަހައިދީފައެވެ. މުލާ އެންމެ ފުރަތަމަ ކުޅުނީ އާޖެންޓީނާ އަތުން 1-0 އިން ޖަރުމަނު ބަލިވި މެޗުގައެވެ. އޭގެ ހަތަރު އަހަރު ފަހުން، ޖަރުމަނުން 2014 ވަނަ އަހަރުގެ ފީފާ ވޯލްޑް ކަޕްގެ ފައިނަލް މެޗުގައި އާޖެންޓީނާ ބަލިކޮށް، ތަށި އުފުލާލި ޓީމުގައި އޭނާ ވަނީ މުހިއްމު ދައުރެއް އަދާކޮށްފައެވެ.
ގައުމީ ޓީމާއެކު މުޅި ޖުމްލަ ހަތަރު ވޯލްޑް ކަޕާއި ހަތަރު ޔޫރޯގައި ކުޅެފައިވާ މުލާ ވަނީ 2010 ވަނަ އަހަރުގެ ވޯލްޑް ކަޕްގެ އެންމެ މޮޅު ޒުވާން ކުޅުންތެރިޔާ އާއި އެ ފަހަރުގެ ވޯލްޑް ކަޕްގައި އެންމެ ގިނަ ގޯލު ޖަހައިގެން ރަން ބޫޓު ހާސިލްކުރި ކުޅުންތެރިޔާގެ މަގާމު ހޯދައިފައެވެ.
