ކޮޕާ އެމެރިކާގެ ފައިނަލް މެޗުގައި މީގެ ދެ ދުވަސް ކުރިން އަނިޔާވެ މެސީ ބޭލިއިރު އޭނާގެ ފައިގެ ކުޑަހުޅު އޮތީ ދުޅަވެ އަރާފައެވެ. އެ ދުވަހުގެ ރިޕޯޓްތައް ބުނީ މެސީގެ އަނިޔާ ސީރިއަސް ކަމަށެވެ.
އަނިޔާ ވެގެން ބޭލިއިރު ފެނުނީވެސް މެސީ ގަދައަށް ރުއި މަންޒަރެވެ. އެހެންނަމަވެސް ސޯޝަލް މީޑިއާގައި މެސީ މިއަދު ބުނީ އޭނާ އޯކޭ ކަމަށެވެ. މާބޮޑު އަނިޔާއެއް ނުވާ ކަމަށް މެސީ ބުނި ނަމަވެސް މެސީއަށް ލިބުނު އަނިޔާގެ ތަފްސީލެއް ނޭގެއެވެ.
އާޖެންޓީނާއިން ކޮލަމްބިއާ ބަލިކޮށް ވިދިވިދިގެން ދެވަނަ ފަހަރަށް ކޮޕާ އެމެރިކާ ކާމިޔާބު ފައިނަލް މެޗުގައި އަނިޔާ ވެގެން މެސީ ބޭލީ 66 ވަނަ މިނިޓުގައެވެ.
މެޗަށް ފަހު އާޖެންޓީނާގެ ކޯޗު ބުނި ގޮތުގައި މެސީގެ ކުޑަ ހުޅަށް އަނިޔާވިނަމަވެސް އޭނާ ބޭނުންވީ ކުޅޭށެވެ. އެކަމަކު ލިބިފައިވާ އަނިޔާގެ ސަބަބުން އެއްގޮތަކަށްވެސް ކެތް ނުކުރެވިގެން އޭނާ ބަދަލު ކުރަން މަޖުބޫރުވީއެވެ.
