ކަރެކްޝަނުން ބުނީ، އެ ދެ ވޯކްޝޮޕް ކުރިއަށްދާނީ މި މަހުގެ 14 ވަނަ ދުވަހުން ފެށިގެން 14 ދުވަހުގެ މުއްދަތަކަށް ކަމަށެވެ. އެގޮތުން ލިޔެލާ ޖެހުމުގެ ވޯކްޝޮޕްގައި 10 ޕްރިޒަން އޮފިސަރުން ބައިވެރިވެފައިވާ ކަމަށާއި، ކަސަބު ގެތުމާބެހޭ ވޯކްޝޮޕްގައި 6 ޕްރިޒަން އޮފިސަރުންނާއި 4 ސިވިލް މުވައްޒަފުން ބައިވެރިވެފައިވާ ކަމަށެވެ.
މި ދެ ވޯކްޝޮޕްގެ މައިގަނޑު މަގްސަދަކީ ދިވެހި ސަގާފީ މަސައްކަތްތައް އާލާކުރުމަށްޓަކަށް އޮފިސަރުންނާއި މުވައްޒަފުން ތަމްރީންކޮށް އެމީހުން މެދުވެރިކޮށް ޖަލުގައި ހުކުމް ތަންފީޒުކުރަމުންދާ ގައިދީންނަށް އެ މަސައްކަތްތައް ދަސްކޮށްދީ، މިއަހަރުތެރޭ މާފުށީ ޖަލުގައި ގާއިމްކުރުމަށް ނިންމާފައިވާ ކަލްޗަރަލް ސެންޓަރުގައި ގައިދީންގެ އުފެއްދުންތައް ދައްކާލުމާއި، އެތަކެތި ވިއްކައިގެން އާމްދަނީ އެއް ލިބުމުގެ ފުރުސަތު ހޯދައިދިނުން ކަމަށް ކަރެކްޝަނުން ބުންޏެވެ
ކަރެކްޝަންސުން ބުނީ، ގައިދީންނަށް އަމާޒުކޮށްގެން މިފަދަ ވޯކްޝޮޕްތަކާއި ތަމްރީންތައް ހިންގުމަކީ ގައިދީންގެ ރިހެބިލިޓޭޝަނަށް ލިބޭ ބޮޑު ކުރިއެރުމެއް ކަމަށެވެ.
ކަރެކްޝަންސުން އަބަދުވެސް މަސައްކަތްކުރަނީ، ގައިދީން ކުށްކުރުމުން ދުރުހެލިކޮށް، ޖަލުގައި ހޭދަ ކުރާ ދުވަސްތައް ފައިދާކުރުނަވި ދުވަސްތަކަކަށް ހެދުމަށާއި، އެމީހުން ރަނގަޅު ފަރުދުންގެ ގޮތުގައި އަނބުރާ މުޖުތަމައުއަށް ދޫކުރުމަށާއި، ޖަލުން ނިކުތުމަށްފަހު، އާމްދަނީއެއް ހޯދޭނެ މަސައްކަތެއް ދަސްކޮށްދިނުން ކަމަށެވެ.
