ރައީސްގެ އޮފީހުގައި މިއަދު މި ބައްދަލުކުރެއްވުމުގައި ފަރެސްމާތޮޑާ ކައުންސިލުގެ މެންބަރުން ވަނީ އެރަށުގެ ތަރައްގީއަށް އެންމެ ބޭނުންވާ ކަންކަމާއި ކުރިމަތިވާ ދަތި މައްސަލަތައް ހިއްސާ ކުރއްވައިފަ އެވެ. އެގޮތުން:
- ފުޓްބޯޅަ ދަނޑުގެ މަސައްކަތް ނުނިމި އޮތުން
- ސިއްހީ ދާއިރާގެ ކުރިއެރުމަށް ބޭނުންވާ ކަންކަމާއި ބަނދަރުގެ މަސައްކަތް ނުފެށި އޮތުމުގެ ކަންބޮޑުވުން
- ފަރެސްމާތޮޑާއާއި އެއަރޕޯޓް ގުޅުވައިދޭ ކޯޒްވޭގެ މަސައްކަތާއި ފަރެސްމާތޮޑާ އެއަރޕޯޓާއި ގުޅިގެން ހުރި ކަންބޮޑުވުންތައް
- އެރަށުން އިތުރު ގޯތި ދިނުމާއި ސިނާޢީ ބޭނުންތަކަށް ބިން ހިއްކަން ބޭނުންވާކަން
މި ބައްދަލުކުރެއްވުގައި ނައިބު ރައީސް ވަނީ އެރަށުގެ ފުޓްބޯޅަ ދަނޑުގެ މަސައްކަތް އަވަސްކުރުމަށް ކުރެވެންހުރި ހުރިހާ މަސައްކަތެއް ކޮށްދެއްވާނެކަމުގައި ވިދާޅުވެފަ އެވެ. އަދި ކައުންސިލުން ފާހަގަކުރެއްވި ކަންކަމުގައިވެސް ކަމާގުޅޭ ފަރާތްތަކާއެކު މަޝްވަރާ ކުރައްވާނެކަމުގަ އެވެ.
ރާއްޖޭގެ އިގުތިސާދަށް މިވަގުތު އޮތް ހާލަތާ ގުޅިގެން ދައުލަތުގެ ހަރަދުތައް ކުޑަކުރުމަށް ފިޔަވަޅުތަކެއް އެޅުމަށް ސަރުކާރުން ނިންމާފައިވާތީ ކައުންސިލުތަކުގެ ހަރަދު ކުޑަކުރުމަށްޓަކައި ދަތުރުތަކާއި ހަފުލާތަކާއި މުބާރާތްތައް މަޑުޖައްސައިލުމަށް ލޯކަލް ގަވަރމަންޓް މިނިސްޓްރީއިން ވަނީ އަންގަާފަ އެވެ.
އަދި ސަރުކާރުގެ ވުޒާރާތަކާ ބައްދަލުކުރެއްވުމަށް މި ދުވަސްވަރު މާލެ ވަޑައިގަތުމުގެ ބަދަލުގައި ޓެކްނޮލޮޖީގެ ބޭނުން ހިފައި އޮންލައިންކޮށް ބައްދަލުވުންތައް ރޭއްވެވުމަށް ޚާއްސަ ސަމާލުކަމެއް ދިނުމަށް ވެސް ސާކިއުލާގައި ވަނީ އެދިވަޑައިގެންފަ އެވެ.
