އެމަނިކުފާނު މިހެން ވިދާޅުވީ ރައީސުލްޖުމްހޫރިއްޔާ ދެއްވާ ހާއްސަ ސްކޮލަރޝިޕާއި، ހައި އެޗީވާސް ސްކޮލާޝިޕްގެ ލިޔުން ހަވާލުކޮށްދެއްވުމުގެ ރަސްމިއްޔާތު ޝަރަފުވެރިކޮށްދެއްވައި ދެއްވާ ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ މަތީ ތައުލީމީ ހާސިލުކުރުމަށް ފަހު ބައެއް ދަރިވަރުން ރާއްޖެ ނާންނަކަމަށެވެ. އަދި ރާއްޖެ އަންނަ ދަރިވަރުންވެސް އަމިއްލަ ދާއިރާތަކުގައި މަސައްކަތްކުރާކަން ރައީސް މުއިއްޒު ފާހަގަ ކުރައްވިއެވެ.
ރައީސް ދަރިވަރުންނަށް މިރޭ ވަނީ ޔަގީންކަމެއް ދެއްވާފައެވެ. އެގޮތުން ކިޔަވައިގެން އަންނަ ކުދިންނަށް ރަނގަޅު ވަޒީފާއާއި ބޮޑު މުސާރަ ދެއްވާނެކަމުގެ ޔަގީންކަން އެމަނިކުފާނު ވަނީ އަރުވާފައެވެ.
ރައީސް ވިދާޅުވި އަންނަ އަހަރުން ފެށިގެން އުމްރާނީ ތަރައްގީގެ ބަޖެޓުން 200 މިލިޔަން ރުފިޔާ، އިންސާނީ ތަރައްގީއަށް ހަރަދު ކުރެވާނެކަމަށެވެ. އެކަން ކުރައްވަނީ ކިޔަވައިގެން އަންނަ ޒުވާނުންނާއި އަމިއްލަ ދާއިރާތަކުގައި އުޅޭ ޒުވާނުންނަށް ސަރުކާރުން ވަޒީފާ ދީ، ބޮޑެތި މުސާރަ ހަމަޖެއްސުމަށްކަމަށް ރައީސް ޑރ. މުއިއްޒު ވިދާޅުވިއެވެ. އަދި އޭރުން އަމިއްލަ ދާއިރާތަކަށް ވުރެ ސަރުކާރުގެ ވަޒީފާތައް ރަނގަޅުވާނެކަންވެސް ރައީސް ފާހަގަކުރެއްވިއެވެ.
މަތީ ތައުލީމު ހާސިލުކުރުމަށްފަހު ރާއްޖެ ނާންނަ އއް ސަބަބެއްގެ ގޮތުގައި ބޯހިޔާވަހިކަމުގެ ދަތިކަން ފާހަގަކުރައްވަމުން ރައީސް ވިދާޅުވީ އެކަން ހައްލުކުރުމަށް ސަރުކާރުން ވަރަށް އިސްކަމެއް ދެއްވާކަމަށާއި ގެދޮރުވެރިކަމުގެ ދަތިކަން ވެސް ކުރިޔަށް އޮތް ތަނުގައި ފިލުއްވައިދެއްވާނެ ކަމަށެވެ.
