ފެނަކައިން ބުނީ އެކުންފުނިން ހިދުމަތް ދެމުންގެންދާ ވަރަށް ގިނަ ރަށްރަށުގައި ކަރަންޓްގެ ހާލަތު މި ހިނގާ 2024 ވަނަ އަހަރު ފެށުނުއިރު ހުރީ ރަނގަޅުކުރަން ޖެހިފައިކަމަށެވެ. އެގޮތުން ވަރަށް ގިނަ ރަށްރަށުގައި ކެޕޭސިޓީ އިތުރުކުރަން ޖެހޭއިރު ގިނަ ރަށްްތަކެއްގައި ޖަނެރޭޓަރުތައް އޯވަހޯލްކުރަން ޖެހިފައިވާކަން ފެނަކައިން ބުނެއެވެ.
ފެނަކައިގެ ޑިރެކްޓަރު އަހްމަދު އިބްރާހިމް ވިދާޅުވީ މިއަހަރުގެ ފުރަތަމަ ކުއާޓާގައި 20 ޖަނަރޭޓަރެއް ގެނެސް އިންސްޓޯލްކޮށްފައިވާއިރު އަހަރުގެ މިހާތަނަށް 43 އައު ޖަނަރޭޓަރު ގެނެސް އެކި ރަށްރަށުގައި އިންސްޓޯލްކޮށްފައިވާކަމަށެވެ. އަދި ގިނަ ރަށްރަށުގައި ކަރަންޓްގެ ހާލަތު މިއަހަރު ފެށުނުއިރު ހުރި ވަރަށް ވުރެ މިހާރު ރަނގަޅުކޮށްފައިވާކަމަށްވެސް އޭނާ ވިދާޅުވިއެވެ.
ފެނަކައިން އަލަށް ގެނައި ޖަނެރޭޓަރު ސެޓެއް އިންސްޓޯލްކުރަނީ
ޖަނެރޭޓަރުތައް ގެނައި ބައެއް ރަށްތައް
- ހއ އުލިގަމް 250 ކިލޯވޮޓް
- ހއ. ފިއްލަދޫ 250 ކިލޯވޮޓް
- ހއ. ވަށަފަރު 400 ކިލޯވޮޓް
- ހއ. ދިއްދޫ 1000 ކިލޯވޮޓް
- ހއ. ވައިކަރަދޫ 250 ކިލޯވޮޓް
- ކުޅުދުއްފުށި ސިޓީ 800 ކިލޯވޮޓް
- ށ. ބިލެތްފަހި 250 ކިލޯވޮޓް
- ށ. މާއުނގޫދޫ 400 ކިލޯވޮޓްް
- ނ. ހޮޅުދޫ 800 ކިލޯވޮޓް
- ބ. ފުޅަދޫ 250 ކިލޯވޮޓް
- ޅ. ނައިފަރު 600 ކިލޯވޮޓް
- މ. މުލި 600 ކިލޯވޮޓް
- ތ. ދިޔަމިގިލި 250 ކިލޯވޮޓް
- ތ. ތިމަރަފުށި 400. 800 ކިލޯވޮޓް
- ތ. ވިލިފުށި 400 ކިލޯވޮޓް
- ތ. ގުރައިދޫ 800 ކިލޯވޮޓް
- ގދ. ހޯޑެއްދޫ 400 ކިލޯވޮޓް
- ފުވައްމުލަކު ސިޓީ 800 ކިލޯވޮޓް
މިއަހަރު ފެށުނު ފަހުން ގިނަ ރަށްތަކެއްގައި ކަރަންޓް މައްސަލަތައް ވަނީ ކުރިމަތިވާން ފަށާފައެވެ. އެގޮތުން ކުޅުދުއްފުށްޓާއި އައްޑޫ ސިިޓީ އާއި ފުވައްމުލަކު ސިޓީގެ އިތުރުން އެހެން ބައެއް ރަށްތަކުންވެސް ކަރަންޓް ކެނޑި ރައްޔިތުންނަށް ގިނަ ދަތިތަކާއި ކުރިމަތިލާން ޖެހުނެވެ. މިދިޔަ ހަފްތާގައި މ. ކަރަންޓް ކެނޑި އެރަށަށް ކަރަންޓް ހިދުމަތް ދެވުނީ އެއްދުވަސް ފަހުންނެވެ.
ފެނަކައިގެ މެނޭޖިން ޑިރެކްޓާ މުއާޒު މުހައްމަދު ރަޝީދު ދާދި ފަހުން ވިދަޅުވީ އިންތިގާލީ މަރުހަލާގައި ފެނަކަ ކުންފުނީގެ ދަރަންޏަކީ 4.3 ބިލިއަން ރުފިޔާކަމަށް ފެނުނު ނަމަވެސް ސަރުކާރާ ހަވާލުވެ ބަލައިލުމުން ކުރިން ނުފެންނަ އެތައް ބިލެއް ފެނުނު ކަމަށެވެ. އަދި ރެކޯޑު ނުކުރެވި ހުރި މަސައްކަތްތަކުގެ ބިލު ހިފައިގެން އެތައް ބަޔަކު އަންނަމުންދާ ކަމަށް މުއާޒު ވިދާޅުވިއެވެ.
