މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަން ބިލުގެ ނަމުގައި އެ ބިލު މަޖިލީހަށް ހުށަހެޅީ ސަރުކާރަށް އެއްބާރުލުންދޭ ތުޅާދޫ ދާއިރާގެ އަމިއްލަ މެންބަރު އަބްދުލްހަންނާނު އަބޫބަކުރެވެ. މި ބިލު މަޖިލީހުން ބަލައިގަނެ، އިތުރަށް ދިރާސާކުރުމަށް މިނިވަން މުއައްސަސާތަކާ ބެހޭ ކޮމިޓީއަށް ވަނީ ފޮނުވާފަ އެވެ. އެ ކޮމިޓީން ވަނީ މި ބިލުގެ މަސައްކަތް އަންނަ މަހުގެ 15 ގެ ކުރިން ނިންމުމަށް ފާސްކޮށްފަ އެވެ.
އާރްއެސްއެފްގެ ދެކުނު އޭޝިއާ ޑެސްކުގެ އިސްވެރިޔާ ސެލިއާ މާސިއާ ވިދާޅުވީ މި ބިލަކީ ރާއްޖޭގައި އޮތް މީޑީއާގެ މިނިވަންކަމަށް ދޭ ހަމަލާއެއް ކަމަށާއި ވެރިކަމުގެ ބާރުގެ ނުފޫޒު އޮންނަ ކޮމިޝަނަކުން މީޑިއާގެ ކަންކަން ރެގިއުލޭޓް ކުރުމަކީ ސެންސަޝިޕަށް ދެވޭ ހިތްވަރެއް ކަމަށެވެ. އެގޮތުން މި ބިލުގެ ދަށުން އުފެދޭ ކޮމިޝަނަށް ކޯޓު އަމުރަކާ ނުލައި ވެސް ވެބްސައިޓުތައް ބްލޮކް ކުރުމުގެ ބާރު ލިބިދޭކަން ފާހަގަކުރަމުން މާސިއާ ވަނީ މި ބިލު މަޖިލީހުން ވަގުތުން ބޭރުކުރުމަށް ގޮވާލާފަ އެވެ.
މީޑިއާ އެންޑް ބްރޯޑްކާސްޓިން ކޮމިޝަނުގައި ތިބޭނީ ހަތް މެންބަރުން ކަމަށް ބިލުގައި ބުނެ އެވެ. އޭގެ ތެރެއިން ތިން މެންބަރުންނަކީ ރައީސް އައްޔަން ކުރާ މެންބަރުންނެވެ. އަނެއް ހަތަރު މެންބަރުންނަކީ މީޑިއާތަކުގެ ފަރާތުން އިންތިހާބު ކުރާ މެންބަރުންނެވެ. އެފަދަ އިންތިހާބެއްގައި ބައިވެރިވެވޭނީ ވުޖޫދުވިތާ ފަސް އަހަރުވެފައިވާ މީޑިއާތަކަށެވެ.
މީޑިއާ ރެގިއުލޭޓު ކުރަން އެކުލަވާލާ ކޮމިޝަނެއްގައި ރައީސް އައްޔަން ކުރާ މެންބަރުންތަކެއް ތިބެންޖެހޭ ސަބަބެއް އެ ބިލުގައި ބަޔާންކޮށްފައެއް ނުވެ އެވެ. އަދި ބިލުގައިވާ ގޮތުން ކޮމިޝަނުގެ ރައީސް އައްޔަން ކުރަންޖެހެނީ ރައީސުލްޖުމްހޫރިއްޔާ އެވެ.
އިތުރަށް ކިޔާލަން: މީޑިއާ ބިލުން ފެންނަނީ ސަރުކާރުން ގޯހެއް ހަދަން އުޅޭތަން: އިދިކޮޅު
ބިލް އަނބުރާ ގެންދިޔުމަށް، މޯލްޑިވްސް މީޑިއާ ކައުންސިލް (އެމްއެމްސީ) އަދި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) ގެ އިތުރުން ގިނަ އަދަދެއްގެ ނޫސްވެރިން ގޮވާލަމުން ދަނީ ބިލު ވަގުތުން ބޭރުކޮށްލުމަށެވެ.
މިހާރު އެ ބިލުގައިވާ ގޮތުން، އެ ބިލު ގާނޫނަކަށް ވުމާ އެކު، މިހާރު އޮތް މީޑިއާ ކައުންސިލާއި ބްރޯޑްކާސްޓިން ކޮމިޝަން އުވޭނެ އެވެ. އެެއަށް ފަހު އެތަނުގެ މަސައްކަތްތައް ކުރިއަށް ގެންދާނީ "މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން" ނަމުގައި ރައީސް އުފައްދަވާ އޮފީހަކުންނެވެ.
