ޓީ ޓުވެންޓީ ޕްރިމިއާ ކްރިކެޓް ލީގުގެ ޗެމްޕިއަންކަން މިލާން ކްރިކެޓް އެކަޑަމީން ހޯދީ، ހަ ޓީމާ ވާދަކުރި މުބާރާތުގައި ވެސް ސައްތަ އިން ސައްތަ ރެކޯޑަކާ އެކު، ކުޅުނު ހުރިހާ މެޗަކުން މޮޅުވެގެންނެވެ.
މިލާނުން އެއް ވަނަ ހޯދީ 10 ޕޮއިންޓާ އެކު އެވެ. ދެ ވަނަ އަށް ދިޔަ މާލޭ ސްޕޯޓްސް ކްލަބާއި ތިން ވަނަ ހޯދި ސީބީއެލް އަށް ވަނީ ހަ ޕޮއިންޓް ލިބިފަ އެވެ. ހަތަރު ވަނަ ހޯދި ވިޔަންސާ އާއި ފަސް ވަނައިގައި ނިންމި މާލެ ވެޓެރަންސް އަށް ހަތަރު ޕޮއިންޓް ލިބުނުއިރު، ނެޓް ރަން ރޭޓުން ކުރި ހޯދައިގެން، ޓީޓުވެންޓީ ޕްރެޒިޑެންޓްސް ކަޕުން ޖާގަ ހޯދީ ވިޔަންސާ އެވެ.
މުބާރާތުގައި އެންމެ ގިނަ ލަނޑު ހެދީ، މިލާނަށް 281 ލަނޑު ހަދައިދިން އަޒްޔާން އެވެ. އެންމެ ގިނަ ވިކެޓް ނެގީ، 13 ވިކެޓް ނެގި މިލާން ޓީމުގެ ލީމް ޝަފީގް އެވެ.
މި މުބާރާތް މިދިޔަ އަހަރުވެސް ހޯދީ މިލާން ކްރިކެޓް އެކަޑަމީންނެވެ. މިދިޔަ އަހަރު ފަސް ޓީމު ކުޅުންއިރު، މިލާން އެކަޑަމީވަނީ ކުޅުން ހުރިހާ މެޗަކުން މޮޅުވެފައެވެ.
