މިއަދުގެ ޖަލްސާގައި މި އެއްބަސްވުމުގައި ބައިވެރިވާން ފެނޭތޯ ނެގި ވޯޓުގައި ރާއްޖެއާއި ލަންކާއާ ދެމެދު އެއްބަސްވުމެއް ހެދުމަށް ފާސްކުރީ ވޯޓުގައި ބައިވެރިވެވަޑައިގެންނެވި 72 މެންބަރުންގެ އިއްތިފާގުންނެވެ.
މިފަދަ އެއްބަސްވުމެއް ގާއިމުކުރުމާ ގުޅޭ ގޮތުން ރައީސް ޑރ. މުހައްމަދު މުއިއްޒު މަޖިލިހަށް ފޮނުއްވި ސިޓީގައި ވިދާޅުވެފައި ވަނީ މިއީ ރާއްޖެއާއި ލަންކާއާ ދެމެދު އޮތް ގުޅުން ދެމެހެއްޓުމަށާއި ޖިނާއީ ކުށްތައް ހުއްޓުވުމަށް ދެ ގައުމުގެ އެހީތެރިކަމާއި އެއްބާރުލުން އެއް ގައުމުން އަނެއް ގައުމަށް ދިނުމުގެ ބޭނުމުގައި ގާއިމުކުރާ އެއްބަސްވުމެއް ކަމަށެވެ.
އެގޮތުން މި އެއްބަސްވުމުގެ ދަށުން އެ ގައުމެއްގެ ގާނޫނުތަކާއި ގަވައިދުތަކާ އެއްގޮތްވާ ގޮތުގެ މަތިން ޖިނާއީ މައްސަލަތައް ތަހުގީގު ކުރުމުގައްޔާއި ޝަރީއަތް ހިންގުމުގައި ދެވެން އޮތް އެންމެ ފުޅާދާއިރާއެއްގައި އެހީތެރިކަން ދޭނެ ކަމަށް ރައީސްގެ ސިޓީގައިވެ އެވެ.
މި އެއްބަސްވުމުގެ ދަށުން ކުރަން ޖެހޭ ހަރަދުތައް ކުރަން ޖެހޭނީ އެ ކަމަށް އެދި ހުށަހަޅާ ގައުމަކުން ކަމަށް އެއްބަސްވުމުގައިވެ އެވެ.
