ފައިނޭންސް ފޯރަމްގައި ނެޝަނަލް ބިއުރޯ އޮފް ސްޓެޓިސްޓިކްސްގެ ޗީފް ސްޓެޓިސްޓީޝަން އައިޝަތު ހަސަން ވާހަކަ ދައްކަވަމުން ހުށައެޅުއްވި ޕްރެޒެންޓޭޝަންގައި ބުނީ މީގެ 30 އަހަރު ފަހުން 2054 ވަނަ އަހަރު ރާއްޖޭގެ އާބާދީގެ ކޮންމެ 10 މީހުންގެ ތެރެއިން ހަތަރު މީހަކު ވާނީ ބިދޭސީއަކަށް ކަމަށެވެ.
ސްޓެޓިސްޓިކްސް ބިއުރޯ ގެ ލަފާތައް ދައްކާ ގޮތުން މިހާރު މާލޭ ސަރަހައްދަށް މީހުން ހިޖުރަކުރަމުންދާ މިންވަރަށް ހިޖުރަ ކުރާނަމަ މާލޭ ސަރަހައްދަށް ދިވެހި އާބާދީގެ 64 އިންސައްތަ މީހުން ޖަމާވާނެކަމަށެވެ. އަދި މި އަންނަ ބަދަލުތަކަށް ބަލާއިރު އަތޮޅުތަކުގައި 2054 ވަނަ އަހަރު އުޅޭނީ އާބާދީގެ 30 އިންސައްތަ މީހުންކަމަށެވެ.
ނެޝަނަލް ބިއުރޯ އޮފް ސްޓެޓިސްޓިކްސްގެ ޗީފް ސްޓެޓިސްޓީޝަން އައިޝަތު ހަސަން
އައިޝަތު ހަސަން ވިދާޅުވީ ދިވެހިންގެ އެވަރެޖް އުމަރަކީ 80 އަހަރުކަމަށެވެ. އަދި ފިރިހެނުނަށްވުރެ އަންހެނުން އުމުރު ގާތްގަޑަކަށް 7 އަހަރު ދިގުކުރަން އޭނާ ފާހަގަކުރެއްވިއެވެ. އެހެންނަމަވެސް 1995ގެ ކުރިން ރާއްޖޭގައި އުމުރު ދިގީ ފިރިހެނުންކަން ހިސާބުތަކުން ދައްކާކަމަށެވެ.
ރާއްޖޭގެ އާބާދީގެ 50 އިންސައްތަ މީހުންގެ އުމަރު ހުރީ 30 އަހަރުން ދަށުގައިކަމުން މީގެ ދައްކުވައިދެނީ ރާއްޖޭގެ އަބާދީގައި އުމުރުން ދުވަސްވީ މީހުން އިތުރުވަމުން އަންނަކަންކަމަށެވެ.
މި ބަދަލުތަކާއިއެކު 2030ގެ ނިޔަލަށް 65 އަހަރުން މަތީގެ އާބާދީ ހަތް އިންސައްތަ އިތުރުވުމެއް އަންނާނެކަމަށްވެސް ސްޓެޓިސްޓިކްސް ބިއުރޯ ލަފާކުރެއެވެ. އަދި 2050 ވަނަ އަހަރުގެ ނިޔަލަށް ރާއްޖޭގެ އާބާދީގެ އެވަރެޖު އުމުރު 47 އަހަރުން މައްޗަށް އަރާނެކަމަށްވެސް ހިސާބުތަކުން ދައްކައެވެ.
