ފުރަތަމަ ފަހަރަށް މި ފަހަރުގެ އޮލިމްޕިކްސްގައި ރާއްޖޭން ހަތަރު ކުޅިވަރެއްގައި ވާދަކުރާނެ އެވެ. އެއީ، ބެޑްމިންޓަން، އެތުލެޓިކްސް، ސްވިމިން އަދި ޓޭބަލް ޓެނިސް އެވެ. މިއީ، 1988 ވަނަ އަހަރުން ފެށިގެން ރާއްޖޭން އޮލިމްޕިކްސްގައި ވާދަކުރަން ފެށި ފަހުން، އެންމެ ގިނަ ކުޅިވަރު ހިމެނޭ ގޮތަށް ރާއްޖޭން އޮލިމްޕިކްސްގައި ފެންނާނެ ފަހަރެވެ.
އޮލިމްޕިކްސްއަށްދާ ދިވެހި އެތްލީޓުން
ފާތިމަތު ނަބާހާ- ބެޑްމިންޓަން
އިބާދުﷲ- އެތްލެޓިކްސް
މުހައްމަދު އާން ހުސައިން- ސްވިމިން
ޢާއިޝަތު އުލްޔާ ޝާއިގް – ސްވިމިން
ފާތިމަތު ދީމާ – ޓޭބަލް ޓެނިސް
ދިވެހި އެތްލީޓުން މިއަދު ފުރިއިރު، އިއްޔެ، ރާއްޖޭގެ ކޮންޓިންޖެންޓްގެ އެޑްވާންސް ޓީމުވަނީ ޕެރިހަށް ގޮއްސައެވެ. އެއީ، ޗެފް ޑި މިޝަން، ޓީޓީ އެސޯސިއޭޝަންގެ ރައީސް، އަލީ ރަޝީދު (އައްޔަ) އާއި އޮލިމްޕިކް ކޮމިޓީގެ ސެކްރެޓަރީ ޖެނެރަލް ތަމޫހު އަހުމަދު ސައީދު (ތަމޫ) އެވެ.
އެތުލީޓުންގެ އިތުރުން ކޮންޓިންޖެންޓުން ކޮންމެ ކުޅިވަރަކަށް ކޯޗުން ވެސް ހިމެނެ އެވެ. މީގެ އިތުރުން، މިއަދު ވަނީ އޮލިމްޕިކް ކޮމިޓީގެ ރައީސް، މުހައްމަދު އަބްދުއްސައްތާރު (ޗަމްޕީ) އާއި ނައިބު ރައީސް، އަހުމަދު މުންތަގިމް (މުންތޭ) ވެސް ކޮންޓިންޖެންޓާ އެކު، ފުރާވަޑައިގެންފަ އެވެ.
