ކޮލިފިކޭޝަންސް އޮތޯރިޓީއިން ކުރި އިއުލާނެއްގައި ބުނީ އެވިޑް ކޮލެޖްގައި ހިންގަމުން އަންނަ ގިނަ ޕްރޮގްރާމްތަކެއްގެ ޝަކުވާ އެ އޮތޯރިޓީއަށް ލިބިފައިވާ ކަމަށެވެ.
މިގޮތުން ލެކްޗަރަރ އިންނަށް ދޭން ޖެހޭ މުސާރަ ދީފައިނުވާތީ، ދަރިވަރުންގެ އިމްތިހާނު ކަރުދާސްތައް ބައެއް ލެކްޗަރަރއިން މާކް ނުކުރުމުގެ ސަބަބުން ޕްރޮގްރާމްގެ މުއްދަތު އިތުރުވެ، އެ މުއްދަތަށް ދަރިވަރުން އިތުރަށް ފައިސާ ދައްކަން ޖެހިފައިވާކަން އެ އޮތޯރިޓީއަށް ހުށަހަޅާފައިވާ ޝަކުވާތަކުގެ ތެރޭގައި ހިމެނޭ ކަމަށެވެ.
މި ޝަކުވާތަކާ ގުޅިގެން އެ އޮތޯރިޓީން ވަނީ އެވިޑް ކޮލެޖްގެ ހަތް ޕްރޮގްރާމެއްގެ "ރެންޑަމް ބެޗް އޮޑިޓް" ކުރިއަށް ގެންގޮސްފައެވެ. މި އޮޑިޓްގައި ޕްރޮގްރާމް އެކްރެޑިޓޭޝަން ގަވާއިދާއި ޕްރޮގްރާމް އެކްރެޑިޓޭޝަން ގައިޑްލައިނާ ހިލާފަށް ގިނަ ކަންތައްތަކެއް އެވިޑް ކޮލެޖުން ކޮށްފައިވާކަން ފާހަގަ ކުރެވިފައިވާ ކަމަށް އެމްކިޔުއޭއިން ބުންޏެވެ.
އޭގެތެރޭގައި ޕްރޮގްރާމްތައް ހިންގަނީ ދީފައިވާ ޕްރޮގްރާމް އެކްރެޑިޓޭޝަނާ އެއްގޮތަށް ނޫންކަން ކަމަށާއި މިގޮތުގެ މަތިން ޕްރޮގްރާމް އެކްރެޑިޓޭޝަން ދީފައިވާ ޕްރޮގްރާމްތަކުގެ ކޮންޓެކްޓް އަވަރސް ހަމަނުކޮށް، ދަރިވަރުން ކޮލެޖަށް ޓިއުޓޯރިއަލް ހުށަހެޅުމުން ލެކްޗަރަރ އިން ޓިއުޓޯރިއަލްތައް ނުބަލައި ދަރިވަރުންނަށް ހާޒިރީ ދީފައިވާކަން ފާހަގަކުރެވެ އެވެ.
އަދި ކޮންޓެކްޓް އަވަރސް ހަމަނުކޮށް ދަރިވަރުންގެ ނަތީޖާ ދީފައިވާކަމާއި ޕްރޮގްރާމްތަކުގެ ކޮންޓެކްޓް އަވަރސް ހަމަކޮށްފައިވޭތޯ ބެލުމަށްޓަކައި ކޮލެޖްގެ ޕާރޓްޓައިމް ލެކްޗަރަރއިންގެ ހާޒިރީ ޝީޓްތަކާއި މުސާރަ ޝީޓްތައް ބެލުމަށް 5 ޖޫން 2024 ގައި އެދުމުން މިއަދާ ހަމައަށް މުސާރަ ޝީޓްތައް ދައްކާފައިނުވާ ކަން ވެސް ފާހަގަކުރެވެ އެވެ. އަދި މުސާރަ ޝީޓްތައް ދެއްކުމަށް އުޒުރުވެރިވެފައިވާއިރު, އެމްކިޔުއޭ އިން ގޮސް ބެލުމަށް އެދުމުން ވެސް އެކަމަށް އިޖާބަދީފައި ނުވާކަން އެ އޮތޯރިޓީން ވަނީ ފާހަގަކޮށްފަ އެވެ.
މީގެއިތުރުން ޕްރޮގްރާމް އެކްރެޑިޓޭޝަން ގައިޑްލައިނާ އެއްގޮތަށް ޕްރޮގްރާމް ސްޓްރަކްޗަރ ރިވައިސްކޮށް ޕްރޮގްރާމް އެކްރެޑިޓޭޝަން ދީފައިވާއިރު، ކުރިން އެޕްރޫވް ކޮށްފައިވާ ޕްރޮގްރާމް ސްޓްރަކްޗަރ އަށް ދަރިވަރުން އެންރޯލްކުރަމުން ކިޔަވައިދެމުން އަންނަ ކަމާއި އަދި ޕްރޮގްރާމް ސަމަރީ ތާވަލާ އެއްގޮތަށް މޮޑިއުލްތައް ކުރިއަށް ގެންގޮސްފައި ނުވާކަމާއ ބިފޯރ ކޮމެންސިންގ ފޯރމް ފޮނުވަންޖެހޭ މުއްދަތުގެ ތެރޭގައި ފޮނުވަމުން ނުދާކަން ވެސް އެމްކިޔުއޭގެ އިއުލާނުގައި ފާހަގަކޮށްފައިވެ އެވެ.
ހަމައެއާއެކު ދަރިވަރުން އެންރޯލްކޮށްފައިވާ ތާރީހާއި އިންޓޭކް ތާރީހާ ދިމާނުވާކަން އަދި ދަރިވަރުންގެ ހާޒިރީ ބަލަހައްޓާނެ އެކަށީގެންވާ ރަނގަޅު ނިޒާމެއް ނެތްކަން އަދި ދަރިވަރުންގެ ނަތީޖާ ޝީޓްތައް ވެސް ބަލަހައްޓާނެ އެކަށީގެންވާ ރަނގަޅު ނިޒާމެއް ނެތްކަން ވެސް ފާހަގަކޮށްފައިވެ އެވެ.
އެ އޮތޯރިޓީން އިތުރަށް ބުނީ ލެކްޗަރަރއިންނަށް ދޭން ޖެހޭ މުސާރަ ދީފައިނުވާތީ، ދަރިވަރުންގެ އިމްތިހާނު ކަރުދާސްތައް ބައެއް ލެކްޗަރަރއިން މާރކް ނުކުރުމުގެ ސަބަބުން ޕްރޮގްރާމްގެ މުއްދަތު އިތުރުވެ، ދަރިވަރުންގެ ނަތީޖާ ނުދެވި ދިގުލައިގެން ގޮސްފައިވާތީ ދަރިވަރުންގެ ޝަކުވާ އިތުރުވުމާ ގުޅިގެން ޖަވާބު ކަރުދާސްތައް މާރކް ކޮށްފައިވަނީ އިންޓަރނަލް ކޮމިޓީއެއް އުފައްދައިގެންކަން މި އޮޑިޓަށް ކޮލެޖުން މައުލޫމާތު ދީފައިވާ ކަމަށެވެ. އެގޮތުން އިމްތިހާން ކަރުދާސްތައް މާރކް ކޮށްފައި ވަނީ ކިޔަވައިދެއްވާފައިވާ ލެކްޗަރަރއިން ކަން ނުވަތަ ނޫންކަން އެނގެން ނެތުމުން، ދަރިވަރުންނަށް ދީފައިވާ ނަތީޖާއާ މެދު ސުވާލު އުފެދޭކަމަށް ވެސް އެމްކިޔުއޭއިން ބުނެފައި ވެއެވެ.
އީ-ލަރނިންގ ގައިޑްލައިންގައި ވާ ގޮތުގެ މަތިން 'ލަރނިންގ މެނޭޖްމެންޓް ސިސްޓަމެއް' މިހާރު ނެތްކަން ފާހަގަކުރެވިފައިވާއިރު ޕްރޮގްރާމްތައް އީ-ލަރނިންގ ޑެލިވަރީ މޮޑަލިޓީގެ ދަށުން އެކްރެޑިޓޭޝަން ދީފައިވާގޮތަށް ޕްރޮގްރާމްތަކަށް ކިޔަވައިދީ އެ ޕްރޮގްރާމްތަކަށް އީ-ލަރނިންގ ޑެލިވަރީ މޮޑަލިޓީގެ ދަށުން އިމްތިހާން ދެވޭނެ އެކަށީގެންވާ ވަސީލަތެއް ނެތްކަން ވެސް ފާހަގަކޮށްފައިވެ އެވެ.
އަޅާފައިވާ ފިޔަވަޅުތައް:
- ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑާ ހިލާފަށް އަދި ޕްރޮގްރާމް އެކްރެޑިޓޭޝަނާ ހިލާފަށް ހިންގާ ކަންކަން ރަނގަޅު ކުރުމަށް އެންގުން.
- އިތުރު ޕްރޮގްރާމަކަށް އެކްރެޑިޓޭޝަނާއި ހިންގުމުގެ ހުއްދަ ދޫނުކުރުން.
- އެ ޕްރޮގްރާމެއް ހިންގަނީ ދިވެހިރާއްޖޭގެ ގައުމީ ސަނަދުތަކުގެ އޮނިގަނޑާ އެއްގޮތަށް ނޫންކަމާއި، ޕްރޮގްރާމް އެކްރެޑިޓޭޝަންގެ މިންގަނޑުތަކާ ހިލާފަށްކަން އާންމުކޮށް އިއުލާނުކުރުން.
އެމްކިޔުއޭއިން ބުނީ މި ފިޔަވަޅުތަކާ އެކު އީ-ލަރނިންގ މޮޑަލިޓީގައި އެކްރެޑިޓޭޝަން ދީފައިވާ ޕްރޮގްރާމްތަކުގެ ސްޓޭޓަސް 6 މަސް ދުވަހަށް (28 ޖުލައި 2024 އިން 28 ޖެނުއަރީ 2025) އަށް 'ކޮންޑިޝަނަލީ އެކްރެޑިޓް' އަށް ބަދަލު ކުރެވިފައިވާ ކަމަށެވެ. އަދި މިއާއެކު، އީ-ލަރނިންގ މޮޑަލިޓީގެ ދަށުން ހުއްދަދެވިފައިވާ އެއްވެސް ޕްރޮގްރާމެއް އިތުރަށް އިސްތިހާރުކޮށް ހިންގޭނީ އަލުން 'ފުލީ އެކްރެޑިޓޭޝަން ސްޓޭޓަސް' އަށް އީ-ލަރނިންގ މޮޑަލިޓީގައި ހިންގުމަށް ހުއްދަ ދެވިގެން ކަމުގައެވެ.
އެމްކިޔުއޭއިން ބުނީ ފިޔަވަޅުތައް އަޅާފައިވީ ނަމަވެސް، މިހާރު އެވިޑް ކޮލެޖުން ކުރިއަށްދާ ބެޗްތައް ކުރިއަށް ގެންދެވޭނެކަމާއި މިފިޔަވަޅުތަކުގެ ސަބަބުން ކިޔަވަމުންދާ ދަރިވަރުންނަށް އެއްވެސް އަސަރެއް ނުކުރާނެ ކަމަށެވެ.
އެވިޑް ކޮލެޖާމެދު ހަރުކަށި ފިޔަވަޅުތަކެއް އަޅާފައިވާއިރު ޕްރޮގްރާމް އެކްރެޑިޓޭޝަން ގަވާއިދުގެ ދަށުން ކްލިކް ކޮލެޖާމެދު ވެސް އެމްކިޔުއޭއިން ވަނީ ފިޔަވަޅު އަޅައިފަ އެވެ. އެމްކިޔުއޭއިން ބުނީ ކްލިކް ކޮލެޖަށް އީ-ލަރނިންގ ޑެލިވަރީ މޮޑަލިޓީގެ ދަށުން އެއްވެސް ޕްރޮގްރާމެއް ހިންގުމުގެ ހުއްދަ އެ އޮތޯރިޓީން ދީފައިނުވާ ކަމަށެވެ. އެހެން ނަމަވެސް، ކޮވިޑް-19 ގެ ވަބާ އާ ގުޅިގެން، ދިވެހިރާއްޖޭގެ ހުރިހާ މަތީ ތައުލީމުދޭ މަރުކަޒުތަކަށް އީ-ލަރނިންގ ޑެލިވަރީ މޮޑަލިޓީގައި، އެ މަރުކަޒުތަކުން އެޕްރޫވް ކޮށްފައިވާ ޕްރޮގްރާމްތައް ހިންގުމުގެ އާއްމު ހުއްދައެއް މާރޗް 2020 ގައި ދީފައިވާ ކަމަށެވެ. އަދި މި ހުއްދަ މުރާޖައާ ކުރުމަށް ފަހު، 18 ޖެނުއަރީ 2021 ގައި އާއްމުކޮށްފައިވާ އެ އޮތޯރިޓީގެ ސަރކިއުލަރއިން ވާނީ ކުއްލި ހާލަތު ނިމި އާއްމު ހާލަތަކަށް ދިއުމުން އަމަލުކުރަންވީ ގޮތް އާއްމުކޮށް އިއުލާންކޮށްފައި ކަމަށެވެ.
ކުއްލި ނުރައްކަލުގެ ހާލަތު 14 މާރޗް 2022 ގައި އުވާލައިފައިވާއިރު، ކޮވިޑް-19 އާ ގުޅިގެން ސަރުކާރުން އެޅުއްވި އެކިއެކި ހިފެހެއްޓުމުގެ ފިޔަވަޅުތައް ވެސް އުވާލައިފައި ވުމާއެކު، އާއްމު ހާލަތަކަށް ގޮސްފައިވާ ކަމަށް ގަބޫލުކުރެވޭތީ، އެ އޮތޯރިޓީން ދީފައިވާ ހުއްދަ 28 އެޕްރީލް 2022 ގައި ބާތިލުކުރިކަން އާއްމުކޮށް އަންގާ އިއުލާންކުރުމަށް ފަހު މަތީ ތައުލީމުދޭ މަރުކަޒުތަކަށް ވެސް އަންގާފައިވާ ކަމަށެވެ.
އެމްކިޔުއޭއިން ބުނީ މި އިއުލާނާއެކު ކޮވިޑް-19 ގެ ހާލަތުގައި ދިން ހުއްދަ ބާތިލުވުމާއެކު ކްލިކް ކޮލެޖުން ކޮވިޑް-19 ގެ ކުރިން އީ-ލަރނިންގ ޑެލިވަރީ މޮޑެލިޓީގެ ދަށުން އެއްވެސް ޕްރޮގްރާމަކަށް ހުއްދަ ނާގާފައިނުވުމާއެކު އިތުރަށް އީ-ލަރނިންގ މޮޑަލިޓީގެ ދަށުން ޕްރޮގްރާމްތަކަށް އިތުރު އިންޓޭކެއް ނަގައިގެން ކުރިއަށް ނުގެންދެވޭނެ ކަމަށެވެ. ނަމަވެސް، 28 އެޕްރީލް 2022 ގެ ކުރިއަށް ފަށާފައިވާ ޕްރޮގްރާމްތަކަށް ކޮވިޑް-19 ގެ ދަށުން ދީފައިވާ ހުއްދައާ އެކު އެ ޕްރޮގްރާމްތައް އީ-ލަރނިންގ މޮޑަލިޓީގައި ކުރިއަށް ގެންދެވޭނެ ކަމަށެވެ.
އަދި މީގެ އިތުރުން ފޭސް-ޓު-ފޭސް ކޮށް ހިންގުމަށް އެޕްރޫވަލް ދީފައިވާ އިތުރު ޕްރޮގްރާމްތައް އީ-ލަރނިންގ ޑެލިވަރީ މޮޑަލިޓީގެ ދަށުން ހިންގުމަށް އިސްތިހާރުކޮށްފައިވާކަން ކްލިކް ކޮލެޖްގެ އިންސްޓަގްރާމް ޕޭޖުންނާއި ކްލިކް ކޮލެޖްގެ ވެބްސައިޓުން އެ އޮތޯރިޓީއަށް އެނގިފައިވާ ކަމަށާއި އަދި 18 ޖުލައި 2024 ވަނަ ދުވަހު ކޮލެޖުގެ އިސްވެރިންނާއެކު ބޭއްވުނު ބައްދަލުވުމުގައި މިކަންކަން އެ އޮތޯރިޓީން ކަށަވަރުކޮށްފައިވާ ކަމަށް ވެސް ބުންޏެވެ.
މަތީގައި ފާހަގަކުރެވިފައިވާ ކަންތައްތަކަކީ ޕްރޮގްރާމް އެކްރެޑިޓޭޝަން ގަވާއިދާއި ޕްރޮގްރާމް އެކްރެޑިޓޭޝަން ގައިޑްލައިނާ ޚިލާފު ކަންތައްތަކެއްކަމަށް ވުމާއެކު، އެ އޮތޯރިޓީގެ އެޑްވައިޒަރީ ބޯޑުގައި 24 ޖުލައި 2024 ގައި މަޝްވަރާކުރެވި އެޑްވައިޒަރީ ބޯޑުގެ ލަފައާއެކު، ކްލިކް ކޮލެޖާމެދު ފިޔަވަޅުތައް އަޅާފައިވާ ކަމަށް އެމްކިޔުއޭއިން ބުންޏެވެ.
އަޅާފައިވާ ފިޔަވަޅުތައް:
- ދިވެހިރާއްޖޭގެ ގައުމީ ސަނަދުތަކުގެ އޮނިގަނޑާ ހިލާފަށް އަދި ޕްރޮގްރާމް އެކްރެޑިޓޭޝަނާ ހިލާފަށް ހިންގާ ކަންކަން ރަނގަޅު ކުރުމަށް އެންގުން.
- އެކްރެޑިޓްނުކޮށް މަތީ ތަޢުލީމުގެ ޕްރޮގްރާމް ހިންގާ މަރުކަޒެއް 10,000 ރުފިޔާއިން ޖޫރިމަނާކުރުން.
- ޕްރޮގްރާމް ހުއްޓުމަށް އެންގުން.
- ސަނަދު ދިނުމުގެ ހުއްދަ ދޫނުކުރުން.
- އެ ޕްރޮގްރާމެއް ހިންގަނީ ދިވެހިރާއްޖޭގެ ޤައުމީ ސަނަދުތަކުގެ އޮނިގަނޑާ އެއްގޮތަށް ނޫންކަމާއި، ޕްރޮގްރާމް އެކްރެޑިޓޭޝަންގެ މިންގަނޑުތަކާ ހިލާފަށްކަން އާންމުކޮށް އިއުލާނުކުރުން.
އެމްކިޔުއޭއިން ބުނީ މި ފިޔަވަޅުތައް އެކްރެޑިޓޭޝަން ހުއްދައާ ނުލާ ހިންގާފައިވާ ކޮންމެ ޕްރޮގްރާމަކަށް އެޅޭނެ ކަމަށެވެ.
މި ފިޔަވަޅުތަކާ ގުޅިގެން، ޕްރޮގްރާމް އެކްރެޑިޓޭޝަން ގަވާއިދު ގެ 29 ވަނަ މާއްދާގެ ދަށުން، އެކްރެޑިޓޭޝަން ހުއްދަ އާއި ނުލާ ހިންގާފައިވާ ޕްރޮގްރާމްތަކުގައި ކިޔަވާ ދަރިވަރުންނަށް ލިބޭ ގެއްލުމުގެ ޒިންމާ އުފުލަންވާނީ ކްލިކް ކޮލެޖުންކަމަށް ވެސް އެމްކިޔުއޭއިން ވަނީ ބުނެފައެވެ.
