އައްބާސް މިހެން ވިދާޅުވީ، ކުޅުދުއްފުށި އުތުރު ދާއިރާގެ މެންބަރު މުހައްމަދު ދާއޫދު ހުށަހަޅުއްވާފައިވާ، ގާނޫނު ނަންބަރު 2/2008 (ވަޒީފާއާ ބެހޭ ޤާނޫނު) އަށް އިސްލާހު ގެނައުމުގެ ބިލަށް ބަހުސް ކުރައްވަމުންނެވެ.
ރާއްޖޭގައި ކޮންސްޓްރަކްޝަން ދާއިރާގައި މަސައްކަތް ކުރައްވާ ކޮންޓްރެކްޓަރުންނަށް ދިމާވާ މައްސަލަތައް އަޑުއައްސަވާ އެ މައްސަލަތަކަށް އެކަށޭނެ ފިޔަވަޅުތަކެއް އެއްވެސް ސަރުކާރަކުން މިހާތަނަށް އަޅާފައި ނުވާކަމަށް އައްބާސް ވިދާޅުވި އެވެ.
އައްބާސް ވިދާޅުވީ، ބިދޭސީން ރާއްޖެ އައުމުގެ ސަބަބުން ގައުމުގެ އިގްތިސާދު ރަނގަޅުވިކަމަށާއި، ކުރިން ރާއްޖޭގައި ދިވެހި މަސައްކަތްތެރިން ތިއްބަސް މިހާރު އުފެއްދުންތެރި މަސައްކަތްތެރި ދިވެހިން ރާއްޖޭގައި ނެތް ކަމަށެވެ.
އައްބާސް އިތުރަށް ވިދާޅުވީ، ބިދޭސީ މަސައްކަތްތެރިންގެ ކޯޓާ އާއި ވިސާ ފީ ނުދައްކާ އެތައް ބަޔަކު ރާއްޖޭގައި އެބަ ތިބި ކަމަށާއި އެ ފައިސާ ނުދެއްކޭ މައިގަނޑު ސަބަބަކީ ބިދޭސީން ރާއްޖޭގެ އެކި ކަންކޮޅުތަކުގައި މަސައްކަތް ކުރަމުންދާއިރު އެ މީހުން ތިބޭ ސަރަހައްދުތަކުން މެޑިކަލް ނުހެދުމުން ކަމަށެވެ.
