"ސީއެންއެމް" އަށް މައުލޫމާތު ދެއްވަމުން މާލޭ ސިޓީ ކައުންސިލްގެ މިޑިއާ އޮފިޝަލު ވިދާޅުވީ ކެޓް ޝެލްޓާގެ ރޭނުމާއި، ހިޔާ ކުރުމާއި، ފެންސު ޖެހުމާ އަދި އޮފީސް ބައި ވެސް މިހާރު އެއްކޮށް ހިޔާކޮށް ނިމިފައިވާކަމަށެވެ.
އޮގަސްޓް މަސް ނިމޭއިރު މަސައްކަތް ނިމޭނެކަމަށް ލަފާ ކުރާކަމަށާއި ފިނިޝިން މަސައްކަތާ އެއްކޮށް މަސައްކަތް ނިމޭނެކަމަށް ލަފާ ކުރެވެނީ ކުރިއަށް އޮތް 2 މަސް ދުވަސް ތެރޭގައި ކަަމަށް ސިޓީ ކައުންސިލްގެ އޮފިޝަލު ވިދާޅުވި އެވެ.
މާލެ ސިޓީ ކައުންސިލުން ރައްޔިތުންނާއި ބައްދަލުކުރުމަށް ލޮނުޒިޔާރަތް ޕާކުގައި ބޭއްވި ބައްދަލުވުމުގައި ވާހަކަދައްކަވަމުން ރޭ މޭޔަރު އާދަމް އާޒިމް ވެސް ވަނީ ޝެލްޓާގެ މަސައްކަތް 70 އިންސައްތަ ނިމިފައިވާކަމަށް ހާމަކުރައްވާފަ އެވެ.
ހުޅުމާލެ ފަރުކޮޅުފުށީގައި ގާއިމުކުރާ ޕެޓް ކެއާ ފެސިލިޓީ ނިމެންދެން މާލޭގެ މަގުމަތީގައި އުޅޭ ބުޅާތަކަށް ވަގުތީ ހިޔާ ފޯރުކޮށްދިނުމުގެ އިންތިޒާމް ވަނީ އެގްރިކަލްޗާ މިނިސްޓްރީން ހަމަޖައްސާފަ އެވެ.
މަގުމަތީގައި އުޅޭ ބުޅާތައް ނެގުމުގެ މައިގަނޑު އަމާޒަކީ އެކިއެކި ސަބަބުތަކާ ހުރެ ބުޅާތަކަށް ލިބޭ ގެއްލުންތަކުން އެ ބުޅާތައް ސަލާމަތް ކުރުން ކަމަށް މިނިސްޓަރު ރަމީލާ މީގެ ކުރިން ވަނީ ވިދާޅުވެފަ އެވެ.
ބުޅާތަކަށް ހާއްސަ ޝެލްޓާތަކެއް އަޅަން ހުޅުމާލެއިން ވަނީ 5،000 އަކަފޫޓުގެ ބިމެއް ހަމަޖައްސައިފަ އެވެ. އެތަން ނިމޭއިރު، ބުޅާތަކަށް ހާއްސަ ހޮޓަލާއި ޕާކް އަދި ފިހާރަ ހުންނާނެ އެވެ.
