ކޮވިޑް1- އާއި ދެކޮޅަށް އެގައުމުން ކުރަމުންދާ މަސައްކަތްތަކުގެ ތެރެއިން ފޭސް މާސްކު ނާޅާ މަގުމައްޗަށް ނުކުމެ އުޅޭ މީހުންނަކީ ނުރައްކަލެއް ކަމަށް ކަނޑައަޅާ މާސްކު ނާޅާ މަގުމައްޗަށް ނުކުމެ އުޅޭ މީހުންނަށް ތިން މަސް ދުވަހުގެ ޖަލުހުކުމެއް ތަންފީޒު ކުރަން ޖެހޭނެ ކަމަށް މޮރޮކޯ ސަރުކާރުން ވަނީ ނިންމާފައެވެ.
ސަރުކާރުން ބުނީ ޖަލު ހުކުމުގެ އިތުރުން، މާސްކު ނާޅާ މަގުމައްޗަށް ނުކުމެ އުޅޭ މީހުން 126 ޑޮލަރުން ޖޫރިމަނާ ކުރުމަށް ނިންމާފައެވެ.
އަންގާރަ ދުވަހު މޮރޮކޯ ސަރުކާރުން މި ނިންމުން ނިންމާފައި ވާއިރު، މާޗް މަހުގެ މެދުތެރޭގައި އެގައުމު ވަނީ ލޮކްޑައުނަށް ގޮސްފައެވެ.
އެގައުމުގައި މާސްކު ވިއްކުމަށް ހަމަޖެހިފައި ވަނީ ސަބްސިޑީ އާއި އެކު މާސްކެއް 0.08 ޑޮލަރަށެވެ.
މޮރޮކޯ އިން ވަނީ ކުރިއަށް އޮތް ހަފްތާގައި ދުވާލެއްގެ މައްޗަށް ހަ މިލިއަން މާސްކު އުފެއްދުމަށް ނިންމާފައެވެ.
މޮރޮކޯއިން މިހާތަނަށް 1,184 މީހުންނަށް ކޮވިޑް-19 ޖެހިފައި ވާއިރު، އެބަލީގައި 90 މީހުން އެގައުމުން ވަނީ މަރުވެފައެވެ.
