ގައުމީ ތަރައްގީ އާއި ތަރިކައިގެ ކޮމިޓީން މިއަދު ވިލާ ކޮލެޖާއި އޭޑީކޭ ހޮސްޕިޓަލް ގެ އިސްވެރިން އާ އެކު ބޭއްވި ބައްދަލުވުމުގައި އެކަން ހާމަކުރީ މަތީ ތައުލީމުގެ ގާނޫނަށް ހުށަހަޅާފައިވާ އިސްލާހުތަކާ ގުޅޭގޮތުން މަޝްވަރާކުރެއްވުމުގެ ތެރެއިންނެވެ.
މިއަދުގެ ބައްދަލަވުމުގައި ވިލާ ކޮލެޖުގެ ވައިސް ޑިރެކްޓަރު ޑރ. އަލީ ނަޖީބު ވިދާޅުވީ ތަރައްގީވެފައިވާ މި ޒަމާނުގައި ޔުނިވާސިޓި ތަކަކަކީ ވަކި މުއްދަތެއް ކަނޑައަޅައިގެން ބަދަލުވިތަންތަނެއް ނޫންކަަމަށެވެ. އެގޮތުން މުއްދަތެއް ކަނޑައަޅައިގެން ޔުނިވާސިޓީތަކަށް ދަރަޖަ ދިނުމަކީ ރަނގަޅުކަމެއް ނޫންކަމަށް ފާހަގަކޮށް ނަޖީބު ވިދާޅުވީ އެއަށް ވުރެ ކުރެވޭނެ ބުއްދިވެރި ކަންކަން ހުރި ކަމަށެވެ.
މިއަދުގެ ގާނޫނުގައި އޮންނަ ގޮތުން ޔުނިވާސިޓީއެއްގެ ދަރަޖަ ދޭނީ، ކޮލެޖެއް ގޮތުގައި 20 އަހަރު ވަންދެން ހިންގުމުންކަމަށް ވީނަމަވެސް ކޮލެޖެއްގެ ގޮތުގައި، މެދުނުކެނޑި ހިންގާތާ 15 އަހަރު ވެފައިވާ ނަމަ ޔުނިވާސިޓީއަކަށް ބަދަލުކުރެވޭ ގޮތަށް މިފަހުން ވަނީ ގާނޫނަށް އިސްލާހެއް ހުށަހަޅާފަ އެވެ. އެކަމުގެ ގާނޫނަށް އިސްލާހު ހުށަހެޅީ މާފަންނު ހުޅަނގު ދާއިރާގެ ޕީއެންސީގެ މެމްބަރު އަބްދުﷲ ރިފާއު އެވެ. އޭގެ އިތުރުން ގާނޫނަށް ހުށަހަޅާފައިވާ އެ އިސްލާހުގައި މަތީ ކޯސްތަކުގައި މަދުވެގެން 1،000 ދަރިވަރުން ކިޔަވަމުން ދާން ޖެހޭނެ ކަމަށް ވެސް ވެއެވެ.
ތައުލީމީ ދާއިރާތަކުގެ އިސްވެރިންނާއިއެކު ކޮމީޓީގައި ކުރިއަށް ދިޔަ މަޝްވަރާ ބައްދަލުވުމުގައި ނަޖީބު ވަނީ ރާއްޖޭގެ އާބާދީގައި މަތީ ތައުލީމަށް ކިޔަވަން ދާނެ ކަމަށް ލަފާ ކުރެވޭ ދަރިވަރުންގެ އަދަދަށް އިޝާރާތްކޮށް އެއް ދާއިރާ އަށް ހާއްސަ ކޮށްގެން ހިންގާ ޔުނިވާސިޓީތައް ސަލާމަތް ވާނެ ކަމާ މެދު ސުވާލު އުފައްދަވާފަ އެވެ.
ގައުމު ކުރިއަރުވަން ޕްރައިވެޓް ސެކްޓަރު އަދާ ކުރާ ރޯލު ވަރަށް ބޮޑު ކަމަށް ވިޔަސް ކޮލެޖެއްގެ ފެންވަރުގައި ހިންގާތީ ވިލާގައި ޕީއެޗްޑީ ފެށުމަށް ހުރަސްތަކެއް އެޅިގެން ދޭކަމަށް ނަޖީބު ކަންބޮޑުވުމާއެކު ފާހަގކުރެއްވި އެވެ.
ދުނިޔޭގެ އެހެން ސަރަހައްދުތަކުން ރާއްޖެއަށް އައިސްގެން މަތީ ތައުލީމު ހާސިލްކުރެވޭނެ މަގެއް ނެތަސް މރާއްޖެ އިން ބޭރަށް ކޮންމެ އަހަރަކު ވެސް އެތައް ކުދިންނެއް ފުރައިގެން ދާކަަމަށް ނަޖީބު ވިދާޅުވި އެވެ.
އެކަމާ ގުޅިގެން ވިލާ ކިލެޖުގެ ޑިރެކްޓަރު ޑރ. އަހުމަދު އަންވަރު ވިދާޅުވީ ޔުނިވާސިޓީއަކަށް ބަދަލުކުރާއިރު މުއްދަތަށް ވުރެ ކިޔަވައިދިނުމުގެ ފެންވަރަށް ބެލުމަށް އިތުރު އިސްލަމެއް ދޭން ޖެހޭނެކަމަށެވެ. އެގޮތުން ފެންވަރު ރަނގަޅު ނުވާ ނަމަ ރާއްޖޭގެ ޔުނިވާސިޓީތަކުގެ އަގު ދުނިޔޭގެ ޔުނިވާސިޓީތަކުގެ ކުރިމަތީގައި ނުހިފެއްޓޭނެކަމަށް ފާހަގަކޮށް އަންވަރު ވިދާޅުވީ އެގޮތަށް ކަން ހިނގައިފިނަމަ ކިޔަވައި ދޭން ވެސް ބޭނުންވަނީ މަތީ ފެންވަރުގެ މީހުން ކަމަށެވެ.
