ކަސްޓަމްސް އިން ނެރުނު ނޫސްބަޔާނެއްގައި ބުނީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ގެދޮރުވެރިޔާ ސްކީމްގެ ދަށުން ދޭ ފުރަތަމަ 4،000 ފްލެޓްގެ ތެރެއިން 100 ފްލެޓް ކަސްޓަމްސްގެ މުވައްޒަފުންނަށް ދިނުމަށް ނިންމައި، ރައީސް އޮފީހުން އެކަން އެ އިދާރާއަށް އެންމެ ފުރަތަމަ އެންގީ މިދިޔަ އަހަރުގެ ސެޕްޓެމްބަރު 19 ގައި ކަމަށެވެ.
ރައީސް އޮފީހުގެ އެ ނިންމުމާ އެއްގޮތަށް، ތިން ކޮޓަރީގެ 85 ފްލެޓާއި 2 ކޮޓަރީގެ 15 ފްލެޓް ކަސްޓަމްސްގެ މުވައްޒަފުންނަށް ދޭން ކަނޑައެޅުމަށް ފަހު، ހައުސިން މިނިސްޓްރީން މިދިޔަ އަހަރުގެ އޮކްޓޫބަރު 25 ގައި ކަސްޓަމްސް އަށް އެކަން އަންގާފައިވާ ކަމަށް ވެސް އެ ބަޔާނުގައި ބުންޏެވެ.
ރައްޔިތުންގެ މަޖިލީހުގެ ޕެޓިޝަން ކޮމިޓީގައި މިނިސްޓަރު ވަނީ މިހާރު އިމާރާތް ކުރަމުންދާ 4000 ފްލެޓްގެ ތެރެއިން ކަސްޓަމްސްގެ މުވައްޒިފުންނަށް 100 ފްލެޓް ހާއްސަކޮށްފައިވާ ކަން އެނގިވަޑައިގެންފައި ނެތް ކަމަށެވެ. އަދި ކަސްޓަމްސްގެ ވެރީން އެ ފްލެޓްތައް ހޯދުމަށް ޝައުގުވެރިވެ މަސައްކަތް ކުރައްވާފައިނުވާ ކަމަށް ވިދާޅުވި އެވެ.
ކަސްޓަމްސްގެ މުވައްޒަފުންގެ ހައްގުތައް ކަށަވަރު ކުރުމާއި، މުވައްޒަފުންގެ ވެލްފެއާއަށް ކުރަންޖެހޭ ކަންކަން ކުރުމަކީ ކަސްޓަމްސްއިން އެންމެ އިސްކަން ދޭނެ ކަންތައްތައްކަން ފާހަގަކޮށް ކަސްޓަމްސްއިން ބުނީ 100 ފްލެޓު ހޯދުމުގެ އިތުރުން ކަސްޓަމްސްގެ މުވައްޒަފުންނަށް ފްލެޓު އެޅުމަށް ބޭނުންވާ ބިން ހޯދުމަށްޓަކައި ކުރަން ޖެހޭ މަސައްކަތް ސަރުކާރާއި ކަމާބެހޭ އިދާރާތަކާ ގުޅިގެން ކުރަމުންދާ ކަމަށެވެ.
މިދިޔަ ސަރުކާރުގެ ގެދޮރުވެރިޔާ ސްކީމަށް ފޯމު ހުށަހެޅި މީހުންގެ ތެރެއިން 15،046 މީހުން ޝަރުތު ހަމަވާ ކަމަށް އޭރުގެ ސަރުކާރުން ކަނޑައެޅި އެވެ. އެމްޑީޕީ ސަރުކާރުން ނިންމީ އެ ހުރިހާ އެންމެންނަށް ވެސް ފުލެޓު ދިނުމަށެވެ. ނަމަވެސް އެ ވެރިކަން ނިމުނުއިރު، ކޮންޓްރެކްޓު ކޮށް، މަސައްކަތް ފަށާފައި ވަނީ 4000 ފުލެއްޓެއްގެ އެވެ.
ފުރަތަމަ 4،000 ފްލެޓް ލިބޭނީ ޕޮއިންޓް ތަރުތީބުން އެންމެ ގިނަ ޕޮއިންޓު ލިބޭ މީހުނަށް ކަމަށް ކަނޑައަޅާފައިވަނިކޮށް އޭސީސީއަށް ހުށަހެޅު މައްސަލައަކާ ގުޅިގެން އެ މަސައްކަތް މަޑުޖައްސާލަން އެންގި އެވެ. އެ ސްކީމަށް ތައްޔާރުކުރި ޕޯޓަލްގެ އެކްސެސް ލިބުމުން، މައްސަލަ ތަހުގީގު ކުރުން ގެންދިޔުމަށް ފަހު، މަސައްކަތް އަލުން ފަށަން ކޮމިޝަނުން ހުއްދަ ދިނީ ފެބްރުއަރީ އެކެއްގަ އެވެ.
ގެދޮރުވެރިޔާ ސްކީމުގެ ދަށުން ފުލެޓު ލިބޭ މީހުންގެ ފައިނަލް ލިސްޓު މި އަހަރުގެ އޮކްޓޫބަރު މަސް ނިމުމުގެ ކުރިން އާންމު ކުރާނެ ކަމަށް ހައުސިން މިނިސްޓަރު، ހައިދަރު އިއްޔެ ވަނީ ވިދާޅުވި އެވެ.
