ޖަޕާން ސަރުކާރުގެ ޕްރޮޖެކްޓް ފޮ ހިއުމަން ރިސޯސް ޑިވެލޮޕްމަންޓް ސްކޮލަރޝިޕް (ޖޭޑީއެސް)ގެ ދަށުން މި އަހަރަށް ދޭން ހަމަޖެހިފައިވާ ހަ ސްކޮލަޝިޕް ފުރުޞަތު ފަހިކޮށްދީ ސަރުކާރާއި ޖަޕާން ސަރުކާރާ ދެމެދު "އެކްސްޗޭންޖް އޮފް ނޯޓްސް" ގައި މިއަދު ވަނީ ސޮއި ވެސް ކޮށްފަ އެވެ.
ފޮރިން މިނިސްޓްރީގައި އޮތް ރަސްމިއްޔާތުގައި، ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ މިނިސްޓަރު މޫސާ ޒަމީރެވެ. ޖަޕާން ސަރުކާރުގެ ފަރާތުން ސޮއިކުރެއްވީ ޖަޕާން ސަރުކާރުން ރާއްޖެއަށް ކަނޑައަޅާފައި ހުންނަވާ ސަފީރު ތަކެއުޗި މިދޮރި އެވެ.
ޖަޕާން ސަރުކާރުން 2020 ވަނަ އަހަރުން ފެށިގެން ދެމުން އަންނަ މި އެހީގެ ދަށުން، އެ ގައުމުގެ އެންމެ މަތީ ފެންވަރުގެ ޔުނިވަސިޓީތަކުގައި މާސްޓާސް ޑިގްރީއަށް ކިޔެވުމުގެ ފުރުސަތު ދިވެހިންނަށް ލިބިގެން ދެ އެވެ.
ފޮރިން މިނިސްޓްރީން ބުނި ގޮތުގައި މި ސްކޮލާޝިޕަކީ މުސްތަގުބަލުގައި އިޖުތިމާއީ، އިގްތިސޯދީ ތަރައްގީގެ ސިޔާސަތުތައް އެކުލަވާލުމާއި ތަންފީޒުކުރުމުގައި ޝާމިލުވާނެ ގާބިލު އަދި ގައުމު އާރާސްތުކުރުމަށް މުހިއްމު ރޯލެއް އަދާކުރާނެ ފުރުސަތެކެވެ.
ޖަޕާނުގެ ސްކޮލަޝިޕާ ގުޅޭ އިތުރު މައުލޫމާތު ހަޔާ އެޑިއުކޭޝަން މިނިސްޓަރީގެ ރަސްމީ ވެބްސައިޓުންނާއި އެ މިނިސްޓަރީގެ ހޮޓްލައިން ނަންބަރާ ގުޅުމުން ލިބޭނެ ކަމަށް އެ މިނިސްޓަރީން މީގެ ކުރިން ވަނީ މައުލޫމާތު ދީފައެވެ.
