ފަބްލިކްސް ވޯކްސް ބެލުމުގައި ހުރި ބައެއް މުދާތަކާއި ގުޅޭގޮތުން ކޮންސްޓަރްކްޝަން މިނިސްޓަރު އަބްދުﷲ މުއްތަލިބް މަޖިލީހުގައި ހެއްދެވީ ބޮޑު ދޮގެއްކަމުން އެކަމަށް މައާފަށް އެދެންޖެހޭކަމަށް މިދިޔަ ސަރުކާރުގައި މިނިސްޓްރީގެ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.
Advertisement
އަކްރަމް މިހެން ވިދާޅުވެފައިމިވަނީ ރައްޔިތުން މަޖިލީހުގެ މެމްބަރަކު ކުރެއްވި ސުވާލަކަށް މަޖިލީހުގައި ކޮންސްޓަރްކްޝަން މިނިސްޓަރު އަބްދުﷲ މުއްތަލިބް ދެއްވި ޖަވަބާކާއި ގުޅިގެންނެވެ.
މަޖިލީހުގެ މެމްބަރަކު ކުރެއްވި ސުވާލަކަށް ޖަވާބުދެއްވަމުން މުއްތަލިބު ވިދާޅުވެފައިވަނީ އެމަނިކުފާނުވެސް ހިމެނިވަޑައިގެންނެވި ސަރުކާރު 2018ގައި ނިމި ވެރިކަން ބަދަލުވިއިރު ފަޅު ފުންކުރަން ބޭނުންވާ ސާމާނު ޕަބްލިކްވޯކްސް ބެލުމުގެ ދަށުގައި ހުންނާނެކަމަށެވެ.
އެހެންނަމަވެސް އެ ހުރިހާ އެއްޗެއް، އެއްވެސް އެއްޗެއް މިހާރު ނުވެސްނެތް، އަޅުގަނޑުމެން ގެންގުޅުނު ބޭބީ ޑްރެޖަރު އެބައޮތް މިހާރުވެސް ތިލަފުށީގައި ބާ ދަގަނޑަށްވެފައި. ލޭންޑިން ކްރާޕްޓްްތަކާއި އެއްޗެހި ވިއްކާލާފައި ހުރީ، އެކްސްކަވޭޓަރުތަކާއި އެއްޗެހި ރަށްރަށުގައި ހުރީ ހަލާކުވެފައި." މުއްތަލިބު މަޖިލީހުގައި ވާހަކަ ދައްކަވަމުން ވިދާޅުވިއެވެ.
މިވާހަކަތަކަށް ރައްދުދެއްވަމުން ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ މިނިސްޓަރު މުއްތަލިބު މަޖިލީހުގައި ހެއްދެވީ ބޮޑު ދޮގެއްކަމަށެވެ. އަދި ރައްޔިތުން މަޖިލީހުގައި މިހާ ބޮޑެތި ދޮގު ހަދާ އޮޅުވާލަން ނުވާނެކަމަށްވެސް އަކްރަމް ވިދާޅުވިއެވެ.
" 2018 ގައި އެމްޑީޕީ ސަރުކާރާ ހަވާލުވި އިރު ތި ވިދާޅުވާ ބޭބީ ޑްރެޖަރު މުއިއްޒުގެ މިނިސްޓަރ ކަމުގައި މިފްކޯ މެދުވެރިކޮށް އެ ކުންފުނިން ފައިސާ ދޭގޮތަށް އަމިއްލަ ކުންފުންޏަކާ ރިޕެއާ ކުރަން ހަވާލުކޮށްފައި ވަނީ، އެކަން ބެލިއިރު މި ރިޕެއާ ކޮށް އެކަމަށްދާ ހަރަދު މިފްކޯއިން އިން ދައްކަންޖެހޭ ކަމުގެ އެއްވެސް މުއާމަލާތެއް ހިނގާފައިވާ ކަމުގެ ލިޔެކިޔުމެއް ފެންނާކަށް ނެތް. އޭރު ބެލިބެލުމުން މި ބޭބީ ޑްރެޖަރ ރިޕެއާ ދާ ހަރަދައް ބަލާއިރު ރިޕެއާ ކޮށްގެން އެ ނެރުމަށް ވުރެ އައު ޑުރެޖަރެއް ގަތުންވެސް މާ ރަނގަޅު." އަކްރަމު އެކްސްގައި ކުރެއްވި ޕޯސްޓްގައިވެއެވެ.
އަކްރަމް ވިދާޅުވީ ޕަބްލިކް ވާކްސްގައި މެއިންޓަނަސް ޑްރެޖިންޖްއަށް ބޭނުންވާ މެޝިނަރީޒް އެމްޑީޕީ ސަރުކާރާ ހަވާލުވިއިރު ހުންނާނެކަމާށައި ލޭންޑިންގް ކުރާފްޓް ތައް ވިއްކާލާފައިވާކަމަށާއި އެކްސްކަވޭޓަރުތައް ރައްރަށުގައި އުކާލާ ދަބަރަށް ވެފައިވާ ކަމަށް ވިދާޅުވެ މިނިސްޓަރު މުއްތަލިބު ދެއްކެވި ވާހަތަކަކީވެސް ދޮގެއްކަމަށެވެ.
" މުއިއްޒުގެ މިނިސްޓަރު ކަމުގައި އުފެއްދި ރޯޑް ކޯޕަރޭޝަނަށް ޕަބްލިކް ވާކްސްގައި ހުރި ތި މެ ޝިނަރީތައް ބަދަލުކުރީ ހަމަ މުއިއްޒުގެ ދައުރުގައި އެތަން އުވާލުމަށްފަހު އަލުން ޕަބްލިކް ވާކްސް އުފައްދަ މަސައްކަތް ކުރަން ފެށި 2018ގައި އެމްޑީޕީ ސަރުކާރު އައިސް އޭގެ 3 މަސް ފަހުން ރަށްރަށް މިނިސްޓްރީ މުވައްޒަފުން ޒިޔާރަތް ކުރަމުން ދިޔަދިޔުމުގައި މުވައްޒަފުންނަށް ފާހަގަވީ ރަށްރަށުގައި ވަލުތެރެއަށް އުކާލަފައި ހުރި މެޟިނަރީޒްތައް، ދެން މީގެ އޮޑިޓް އެއް ހަދަން ފެށި ނަމަވެސް ފުރިހަމަ އިންވެންޓްރީ އެއްނެތް ރޯޑް ކޯޕަރޭޟަން މުއުއިޒުމެން އުވާލަން ވެގެން ފިނޭންސް މިނިސްޓްރީ އަށް ފޮނުއްވި ލިސްޓް ބަލައިގެން ކޮންމެސް ވަރަކަށް އިކްވިޕްމަންޓް އަޅާ ކިޔާ ރަށްރަށު ވަލުތެރެއަށް އުކާލާފައި ހުރި ބައެއް އެއްޗެތި ފާހަގަ ކުރެވުނު." އަކްރަމް ވިދާޅުވިއެވެ.
އަކްރަމް ވިދާޅުވީ ރަށްރަށުން ފެނުނު ގިނަ އެއްޗެތި ހުރީ ދަބަރަށްވެފައިކަމަށާއި ބައެއް ތަކެތި ރިފެއާކޮށްގެން ބޭނުންވެސް ކުރިކަމަށެވެ. އަދި ލޭންޑިން ކްރާޕްޓައް ވިއްކާނުލާކަމަށާއި އެކަންކަން ހިނގިގޮތް ވަރަށް ރަނގަޅަށްް މިހާރު ކޮންސްޓަރަކްޝަން މިނިސްޓްރީގެ ނައިބަކަށް ހުންނެވި ބޭފުޅާއަށް އެނގޭނެކަމަށެެވެ. އަދި އެކަމުގައި ހެދި އޮޑިޓް ރިޕޯޓް މިނިސްޓްރީގައި އޮންނާނެކަމަށްވެސް އަކްރަމް ވިދާޅުވިއެވެ.
" ތިވިދާޅުވާ ލޭންޑިން ކުރާފްޓް ގެ ވާހަކައަށް ބަލާއިރު ދަންނަވަން ޖެހޭނީ އެމްޑީޕީ ސަރުކާރާ ހަވާލުވިއިރު އޮތީ ބާ ދަގަނޑަށް ވެފައި އޮތް 2 ލޭންޑިން ކުރާފްޓް، އަދި ކުޑަކޮށް ބޭނުން ކުރެވޭ 1 ކަތި، މި ވެސް ދުއްވުނީ މަދު ދުވަސް ކޮޅަކު އެ ރިޕެއާ ކޮށްގެންވެސް ބޭނުން ކުރެވޭވަރު ނުވި . ވީމާ އެއްޗެތި ވިއްކާލީކީނޫން . މި ކަންކަން ހިނގާ ދިޔަގޮތް ވަރަށް ރަނގަޅަށް އެގި ވަޑައިގަންނަވާނެ މަނިކުފާނުގެ ޑެޕިޔުޓީ މިނިސްޓަރަކަށް މިހާރު ހުންނެވި އަލީ ސަލީމް (ބުލޭ) އަށާއި އެހެން ދެ މިނިސްޓްރި އެއްގައި މިހާރު މަސައްކަތް ކުރައްވަމުން ގެންދަވާ 4 ބޭފުޅަކަށް. މި މެޝިނަރީސް ތަކާ ބެހޭ ވަރަށް ތަފްސީލީ ރިޕޯޓް އެއްވެސް އެކުލަވާލިން. މި ރިޕޯޓް ރައީސް އޮފީސްއަށާއި ފިނޭންސް މިނިސްޓްރީ އަށް ފޮނުވުނު، ވީމާ މިނިސްޓްރީ ގައި މި ރިޕޯޓް އޮންނަންވާނެ. އެ ރިޕޯޓް ބައްލަވާލައްވާ " މުއްތަލިބަށްް ރައްދުދެއްވުމުގެ ގޮތުން އެކްސްގައި އަކްރަމް ކުރެއްވި ޕޯސްޓްގައިވެއެވެ.
އަކްރަމް ވިދާޅުވީ މިނިސްޓަރު މުއްތަލިބު މަޖިލީހުގައި ދޮގު ހައްދަވާ ނުވަތަ ރަނގަޅަށް މައުލޫމާތު ނެތި ވާހަކަ ދެއްކެވުމުން އެކަމަށް މައާފަަށް އެދެންޖެހޭކަމަށެވެ.
" މި ކަހަލަ ބޮޑެތި އިތުރުފުޅު ހައްދަވާ ނުވަތަ ރަގަޅު މައުލޫމާތް ނެތި ވާހަކަ ފުޅު ދެއްކެވުމުން މަނިކުފާނާއި މަނިކުފާނުގެ ސަރުކާރުގެ ދޯދިޔަަކަމާއި މުއިއްޒު މިނިސްޓްރީ ހިންގެވި ގޮތުގެ ދޯދިޔާކަން ފާހަގަވެގެން ދަނީ. ވީމާ ތިހެން ކަންތައް ކުރެއްވުން ހުއްޓަވާލައްވާ. ވީހާވެސް އަވަހަކަށް މަޖިިލިސްއަށް އަލުން ވަޑއިގެން އާންމު ޖަލްސާ އެއްގައި މި ކަމަށް މެމްބަރުން އަރިހުން މާފަށް އެދިވަޑައިގެން މަނިކުފާނުގެ ރެކޯޑް ރަގަޅުކޮށްލައްވާ." އަކްރަމް ވިދާޅުވިއެވެ.
މިނިސްޓާރު މުއްތަލިބު މަޖިލީހުގައި ވާހަކަ ދައްކަވަމުން ވިދަޅުވީ މިދިޔަ ފަސް އަހަރު ޕަބްލިކް ވޯކްސް އެއްކޮށް ހުރީ ހަލާކުކޮށްލާފައިކަމަށާއި އަލުން މަސައްކަތެއް ކުރާނަމަ ޖެހޭނީ ޕްރޮޖެކްޓެއް ހަދައިގެން ބަޔަކާއި ހަވާލުކުރަން ކަމަށެވެ.
