ރަށްރަށުގެ ކަރަންޓުގެ ހިދުމަތްތައް ހަރުދަނާ ކުރުމާއި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ކުރެވޭ މަސައްކަތްތަކުގެތެރެއިން ފެނަކައިން ވަނީ މަގުބައްތިތައް ހަރުކުރުމުގައި ޔޫޓިލިޓީ ރެގިއުލޭޓަރީ އޮތޯރިޓީ (ޔޫއާރުއޭ) އިން ކަނޑައަޅާފައިވާ ހާއްސަ މިންގަނޑަށް މަގުބައްތިތައް އިސްލާހުކުރުމަށް ރަށްރަށުގެ ކައުންސިލަށް ވަނީ އަންގާފަ އެވެ.
ފެނަކައިން މިފަދަ ފިޔަވަޅެއް އަޅަން ނިންމީ މިދިޔަ މޭ މަހު ރ. އުނގޫފާރުގައި މަގުބައްތިތަކުން ކަރަންޓު ލީކުވެ، ކަރަންޓުގައި ޖެހިގެން މީހަކު މަރުވި ހާދިސާއާ ގުޅިގެންނެވެ.
އެގޮތުން މީގެ ކުރިން އެ މިންގަނޑަށް ފެތޭ ގޮތަށް މަގުބައްތިތަށް އިސްލާހުކުރުމަށް ވަކި މުއްދަތެއް ކަނޑައަޅައި، އެ މުއްދަތު ތެރޭގައި އެކަން އިސްލާހު ނުކޮށްފިނަަމަ، އެ ރަށެއްގެ މަގުބައްތިތަކުން ކަރަންޓު ކަނޑާލުމަށް ނިންމާފައިވާކަން ކައުންސިލްތަކަށް އަންގާފައިވާނަކަން ފެނަކައިން ބުނެ އެވެ.
އެންމެ ފުރަތަމަަ އެ މަސައްކަތް ކުރުަމށް މުއްދަތު ދިނީ 9 ޖޫންގައި ނަަމވެސް ބައެއް ކައުންސިލްތަކުގެ އެދުމުގެ މަތިން މި ފެނަކައިން ވަނީ 3 ޖުލައި ގައި ހަަމައަށް 1 މަސްދުވަހުގެ މުއްދަތެއް ދިފަ އެވެ.
އެ މުއްދަތު މިއަދާ ހަމައަށް ހަމަވިއިރު ފެނަކައިން މިއަދު އަނެއްކާވެސް 21 ދުވަހަށް މަގުބައްތިތަށް އިސްލާހުކުރަން މުއްދަތު އިތުރުކުރުމަށް ވަނީ ނިންމާފަ އެވެ. އެގޮތުން މި މުއްދަތު ހަމަވަނީ މިމަހުގެ 21 އަށް ކަމަށް ފެނަކައިން މައުލޫމާތުދެ އެވެ.
ފެނަކައިން ބުނީ މި މުއްދަތުގެ ތެރޭގައި ރަށު ކައުންސިލްތަކަށް އެ ކޯޕޮރޭޝަންއާއި ގުޅިގެން އެ މަސައްކަތް ކުރުމުގެ ފުރުސަތު ޖުލައި 7 ވަނަ ދުވަހާ ހަމައަށް ހުޅުވާލާފައިވާކަމަށެވެ. އަދި އެ މުއްދަތުގެ ތެރޭގައި މަގުބައްތިތައް ޔޫއާރުއޭ އިން ކަނޑައަޅާފައިވާ މިންގަނޑު އެ ފަދައިން އިސްލާހުނުކޮށްފިނަމަ އެ ރަށެއްގެ މަގު ބައްތިތަކުން ކަރަންޓު ކަނޑާލެވޭނެ ކަަމަށް ފެނަކައިން ބުނެ އެވެ.
މިއަދު ފެނަކަ ކޯޕޮރޭޝަނުން ބޭއްވި ޕްރެސް ކޮންފަރެންސްގައި އެ ކުންފުނީގެ މެނޭޖިން ޑިރެކްޓަރު މުއާޒު މުހައްމަދު ރަޝީދު، މަގުބައްތިތައް އޮތްގޮތުގެ ނުރައްކަލަށް އަލިއަޅުއްވާލި އެވެ.
މުއާޒް ވިދާޅުވީ ރަށްރަށުގެ ސްޓްރީޓް ލައިޓްތަކާއި އިޖްތިމާއީ ދިއްލުންތައް ދިއްލުމަށްޓަކައި ބޭނުންކުރާ ތަންތަނަކީ ކައުންސިލްތަކުން ގާނޫނީ ގޮތުން ބަލަހައްޓަން ޖެހޭ ތަންތަން ކަަމަށެވެ.
