ޓީވީއެމްގެ "ހެނދުނު ހެނދުނާ" ޕްރޮގްރާމްގައި ވާހަކަ ދައްކަވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަހުމަދު މުހައްމަދު ވިދާޅުވީ ރާއްޖެ އަށް ދިމާވެފައިވާ ޓީޗަރުންގެ ދަތިކަމަށް ހައްލެއް ގެނައުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެއް ކަމަށެވެ.
އަހުމަދު ވިދާޅުވީ އަންނަ ސެޕްޓެމްބަރުގައި އޭ ލެވެލް ފަށާ ދަރިވަރުންގެ ތެރެއިން ޓީޗިންގެ ދާއިރާއިން ކުރިއަށްދާން ބޭނުންވާ ދަރިވަރުންނަށް 1،500 ރުފިޔާގެ އެލަވެންސެއް ދޭން ނިންމާފައިވާ ކަމަށެވެ.
އަދި ވިދާޅުވީ، ޓީޗަރުން ބިނާކުރުމުގެ ގައުމީ ޕްރޮގްރާމް މި މަހުގެ ފަހު ހަފުތާގައި އިފްތިތާހު ކުރައްވާނެ ކަމަށާއި، ރާއްޖެއަށް މިހާރު ބޭނުންވާ ޓީޗަރުންގެ އަދަދު ދެނެގަނެވިފައިވާ ކަމަށެވެ.
ތައުލީމީ ދާއިރާއަށް ވަންނަ ދިވެހިންގެ އަދަދު މަދުވާ ސަބަބަކީ މަސައްކަތާ އެއްވަރުގެ މުސާރައެއް ނުލިބުން ކަމަށް ބުނެ، ކުރީގެ ސަރުކާރުން މެއި، 2022 ގައި ޓީޗަރުންނާއި ޕްރިންސިޕަލުންގެ މުސާރަ ބޮޑުކުރި އެވެ.
ރާއްޖޭގައި މަސައްކަތް ކުރާ ދިވެހި ޓީޗަރުންގެ އަދަދު ނިސްބަތުން މަދެވެ. 2000ށް ވުރެ ގިނަ ބޭރުގެ ޓީޗަރުން މަސައްކަތް ކުރާއިރު، ސަރުކާރުން އަމާޒު ހިފާފައިވަނީ ބޭރުގެ ޓީޗަރުންގެ ބަދަލުގައި ދިވެހި ޓީޗަރުން ދާއިރާއަށް ނެރުމަށެވެ.
