އީރާންގެ އާ ރައީސް މަގާމާ ހަވާލުވެވަޑައިގަތުމުގެ ރަސްމިއްޔާތަށް ވަޑައިގެން އުޅުއްވަނިކޮށް މިދިޔަ ބުދަ ދުވަހު ހެނދުނުގެ ވަގުތެއްގައި، ހަނިއްޔާ އަވަހާރަކޮށްލީ އޭނާ ހުންނެވި ގެއަށް ދިން ހަމަލާއެއްގަ އެވެ.
ހަނިއްޔާ ފަސްދާނުލާފައި ވަނީ ދޯހާގެ އުތުރުގައި އޮންނަ ލުސައިލްގެ ގަބުރުސްތާނުގައި އެވެ.
ހަނިއްޔާގެ ޖަނާޒާގައި ގަތަރުގެ އަމީރު ޝޭޚް ތަމީމް ބިން ހަމަދު އަލް-ތާނީ ގެ އިތުރުން ހަމާސް ގެ އިސް ވެރިންނާއި، ފަލަސްތީންގެ އެކި ޖަމާއަތްތަކުގެ މަންދޫބުން ބައިވެރިވެ ވަޑައިގަތެވެ.
ހަނިއްޔާ އަވަހާރަކޮށްލުމަކީ އިޒްރޭލުގެ އަމަލެއް ކަމަށާއި އެކަމުގެ ބަދަލުހިފާނެ ކަމަށް ހަމާސް އާއި އީރާނުން ދަނީ ބުނަމުންނެވެ. އެކަމަކު ހަމަލާއާ ގުޅޭ ގޮތުން އިޒްރޭލުން އެއްވެސް ވާހަކައެއް ނުދައްކަ އެވެ.
1962 ވަނަ އަހަރު އުފަންވި އަދި އަވަހާރަވި އިރު އުމުރުން 62 އަހަރުގެ ހަނިއްޔާ އުފަންވީ ގާޒާ ގެ ރެފިއުޖީ ކޭމްޕެއް ކަމަށް ވާ ޝާތީ ގައެވެ. ފަލަސްތީނުގެ މިވަންކަމަށް މަސައްކަތް ކުރައްވަން އޭނާ ފެއްޓެވީ 1983 ވަނަ އަހަރު ޔުނިވަރސިޓީ ދަރިވަރެއްގެ ގޮތުގައި ހުންނަވައިގެންނެވެ.
ފަލަސްތީނުގެ ބިންތައް ޔަހޫދީންގެ އަތްދަށުން ސަލާމަތްކުރުމަށް ހަނގުރާމަކުރާ ހަމާސްގެ ލީޑަރު ހަނިއްޔާ އަކީ އިޒްރޭލުން ނައްތާލަން ބޭނުންވާ މީހުންގެ ލިސްޓުގެ އެންމެ ކުރީގައި ހިމެނޭ ބޭފުޅެކެވެ. އެހެންވެ އޭނާ އާންމުކޮށް ދިރިއުޅުއްވަނީ ގަތަރާއި ތުރުކީގަ އެވެ. އިޒްރޭލުގެ އެކި ހަމަލާތަކުގައި އޭނާގެ ބޭފުޅުންނާއި އާއިލާގެ ގިނަ ބަޔަކު ވަނީ މީގެ ކުރިން ޝަހީދުކޮށްލައިފަ އެވެ.
