މިދިޔަ ބުރާސްފަތި ދުވަހުގެ ރޭ ޕީއެންއެފްއިން ބޭއްވި ޖަލްސާއެއްގައި ވާހަކަ ދައްކަވަމުން ކުރީގެ ރައީސް އަބްދުﷲ ޔާމީން ވިދާޅުވީ އެމަނިކުފާނުގެ ސަޕޯޓާއި އެކުގައި ގެނައި ސަރުކާރާއި ދުރަށް ޖެހިވަޑައިގަތީ ސަރުކާރުން ހަދާ ގޯސްތަކުން ހަޖަމު ކުރައްވަން އުނދަގޫވެގެން ކަމަށެވެ. އަދި ސަރުކާރުގައި ހުރި ގިނަ މައްސަލަތަކެއް ފާހަގަ ކުރައްވާ އެމައްސަލަތައް ހައްލުނުކުރެވި ދިގުލައިގެން ދާކަމުގެ ޝަކުވާ ޔާމީން ވަނީ ކުރައްވާފައެވެ.
ރައީސް ޔާމީންގެ މި ވާހަކަތަކަށް ރައްދުދެއްވަމުން އެމަނިކުފާނުގެ އެންމެ އަރިސްކޮށް ހުންނެވުމަށްފަހު މިހާރު ރައީސް މުއިއްޒުގެ އެންމެ އަރިސް ބޭފުޅެއްގެ ގޮތުގައި ހުންނެވި އަބްދުއްރަހީމް ވަނީ ރައްޔިތުން ހެއްލިދާނެކަަމަށް މާމޮޅު ވާހަކަ ދައްކަން ނޫޅުމަށް ރައީސް ޔާމީނަށް ގޮވާލައްވާފައެވެ.
އެކްސްގައި އަބްދުއްރަހީމް ކުރެއްވި ޕޯސްޓްގައި ވިދާޅުވީ ރައީސް ޔާމީން މި ސަރުކާރާ ދުރަށް ވަޑައިގަތީ ސަރުކާރުން ގޯސް ހަދާނީ ނޫންކަމަށާއި އިއްޒަތާއި ލައްޒަތަށް އޮތް ދަހިވެތިކަމެއްގެ ސަބަބުންކަމަށެވެ.
ޕީއެންއެފުން ބާއްވާ ޖަލްސާތަކުގައި ރައީސް ޔާމީން ފަހަކަށް އައިސް ގެންދަވަނީ މި ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ. ހާއްސަކޮށް ރައީސް މުއިއްޒު ގެންގުޅުއްވާ ސިޔާސަތުތަކަށް ވަރަށް ބޮޑަށް ރައީސް ޔާމީން ގެންދަވަނީ ފާޑު ވިދާޅުވަމުންނެވެ.
