މި ފަދަ އެންގުމެއް މިއައީ ޓެރަރިސްޓް ހަމަލާއެއްގައި ޝަހީދުވި ހަމާސް ޖަމާއަތުގެ ވެރިޔާ އަދި ފަލަސްތީނުގެ ކުރީގެ ބޮޑުވަޒީރު އިސްމާއީލް ހަނިއްޔާގެ މަރުގެ ބަދަލު ހިފާނެ ކަމަށް އީރާނުން އަދި ހަމާސް ޖަމާއަތުން ބުނެފައި ވަނިކޮށެވެ. އަދި އީރާނުން އިޒްރޭލަށް ދޭ ހަމަލާއިން މެދުއިރުމަތީގައި ހަނގުރާމައެއް ފެށިދާނެ ކަމަށް އެމެރިކާ ތައްޔާރު ކަމަށް ރިޔާސީ ގަނޑުވަރު ވައިޓް ހައުސްއިން ބުނެފައި ވަނިކޮށެވެ.
އީރާންގެ އާ ރައީސް ހުވާކުރެއްވުމުގެ ރަސްމިއްޔާތަށް ހަނިއްޔާ ވަޑައިގެން އުޅުއްވަނިކޮށް އަވަހާރަކޮށްލީ އީރާން ސިފައިން ބަލަހައްޓާ އިމާރާތެއްގައި ހުންނަވަނިކޮށް މެންދަމުގެ ވަގުތެއްގައި ދިން ހަމަލާއެއްގައި ކަމަށް އީރާންގެ މީޑިއާގައި ރިޕޯޓްކޮށްފައިވެ އެވެ. އެކަމަކު އެއީ ކިހިނެއް ދިން ހަމަލާއެއް ކަމުގެ ތަފްސީލެއް ނެތެވެ. ހަމާސް އިން ބުނީ ހަނިއްޔާ ހުންނެވި ގެޔަށް ހަމަލާދިނީ ވައިގެމަގުން ކަމަށެވެ.
މިއީ އިޒްރޭލުގެ އަމަލެއް ކަމަށާއި އެކަމުގެ ބަދަލު ހިފާނެ ކަމަށް އީރާނާއި ހަމާސް އިން ބުނަމުން ދިޔަ ނަމަވެސް މިކަމާ ބެހޭ ގޮތުން އިޒްރޭލުން އެއްވެސް ވާހަކައެއް އިޒްރޭލުން ނުދައްކަ އެވެ.
ރިޕޯޓްތައް ބުނާ ގޮތުން އީރާން މިހާރު އޮތީ އިޒުރޭލަށް ހަމަލާދިނުމަށް ތައްޔާރަށެވެ. މި ހާލަތުގައި އީރާނުން އިޒުރޭލަށް ހަމަލާދޭ މިޒާޖަށް ބަލައި އީރާނާއި އިޒުރޭލުގެ ހަމަނުޖެހުންތަކުގެ ތެރެއަށް އެމެރިކާ އާއި އިނގިރޭސިވިލާތުން ވަނުމަކީ އެކަށީގެންވާ ކަމެކެވެ.
ފަރަންސޭސިވިލާތުގެ އެއްވެސް މީހަކު އީރާންގައި ހުރި ނަމަ އަދި އީރާން މެދުވެރިކޮށް އެހެން ގައުމަކަށް ދަތުރުކުރާނަމަ އީރާން ދޫކޮށް އަވަހަށް ފޭބުމަށް ފަރަންސޭސި ސަރުކާރުން މިއަދު ވަނީ އަންގައިފަ އެވެ. އަދި އެމެރިކާ އެމްބަސީން ނެރުނު ބަޔާނެއްގައި ބުނީ މެދުއިރުމާތީގައި ހަނގުރާމައިގެ "ބިރު" އެބައޮތް ކަމަށާއި އީރާން ހިމެނޭހެން ލުބްނާން އަށް މި ދުވަސްކޮޅު ދަތުރު ނުކުރުމަށް އެދޭ ކަމަށެވެ. އަދި އެމެރިކާ މީހުން ލުބްނާނުން އަދި އެމެރިކާގެ ރައްޔިތަކަށް ނުރައްކާތެރިކަން އޮތް ކޮންމެ ގައުމަކުން ސަލާމަތް ހޯދުމަށް ފައިބުމަށް އެދޭ ކަމަށެވެ.
އެމެރިކާގެ މި އެންގުމަށް ފަހު އިނގިރޭސި ވިލާތާއި އެހެން ބައެއް ގައުމުތަކުން ވެސް ވަނީ ވީ އެންމެ އަވަހަކަށް އީރާން އަދި ލުބްނާނުން ފައިބަން އިލްތިމާސްކޮށްފަ އެވެ.
އީރާންގެ މަދަދުވެރިކަމާ އެކު ލުބްނާންގައި ހަރަކާތްތެރިވާ ހިޒްބުﷲގެ ކޮމާންޑަރުންތައް މަރައި އަދި ފަލަސްތީންގެ ޣައްޒާގައި ހަރަކާތްތެރިވާ ހަމާސްގެ ލީޑަރު އިސްމާއީލް ހަނިއްޔާ މަރާލުމަކީ އީރާނުން ބުނާ ގޮތުގައި އަޅާނުލައި ދޫކޮށްލެވޭ ވަރުގެ ކަންކަމެއް ނޫނެވެ. އިޒުރޭލަށް ދޭ ހަމަލާ އަކީ ހަނގުރާމަވެރި ގުރޫޕްތައް ގުޅިގެން އަދި އިޒުރޭލާ އެކަށީގެންވާ ވަރުގެ ހަމަލާއެއް ކަމަށް ހަދާނެ ކަމަށް ވެސް އިރާނުން ބުންޏެވެ.
އިސްރާއީލުން އިއްޔެ ވަނީ ހަމާސްގެ އަސްކަރީ ގޮފީގެ އިސްވެރިޔާ މުހައްމަދު ޟައިފްވެސް ޝަހީދުކޮށްލައިފައިވާ ކަމަށް ބުނެފަ އެވެ. އޭނާ ޝަހީދުކޮށްލީ މި މަހުގެ 13 ވަނަ ދުވަހު ގާޒާގެ ހާން ޔޫނިސްއަށް ދިން ރޮކެޓް ހަމަލާއެއްގައި ކަމަށްވެސް އިސްރާއީލުން ވަނީ ބުނެފަ އެވެ.
ހަނިއްޔާ އިއްޔެ ވަނީ އޭނާ އާންމުކޮށް އުޅުއްވާ ގަތަރުގައި ފަސްދާނުލައިފަ އެވެ. ހަމާސް އިން ބުނީ ހަނިއްޔާ އަވަހާރަކޮށްލި ނަމަވެސް ޖަމާއަތުގެ ހިތްވަރަށް ބަދަލެއް ނާންނާނެ ކަމަށާއި އިޒްރޭލުގެ އަޅުވެތިކަމުން ފަލަސްތީނު މިނިވަންކުރުމުގެ މަސައްކަތް ހުއްޓުމެއް ނެތި ކުރިއަށްދާނެ ކަމަށެވެ.
