މިނިސްޓަރު ހަލީލް މިހެން ވިދަޅުވީ ރައްޔިތުން މަޖިލީހުގެ މެމްބަރަކު ކުރެއްވި ސުވާލަކަށް މަޖިލީހުގައި މިއަދު ޖަވާބު ދެއްވަމުންނެވެ.
މިނނިސްޓަރު ހަލީލް ވިދާޅިުވީ ގައިން ގަޔަށް ނާރާ ބޮޑެތި ބަލިތައް އާދަޔާ ހިލާފު މިންވަރަކަށް މިހާރަކަށް އައިސް ރާއްޖެއިން ފެންނަމުން ދާކަން ފާހަގަކުރެވިފައިވާކަމަށެވެ. އެ ސަބަބާއި ހެދި ދުނިޔޭގެ ސިއްހަތު ޖަމިއްޔާ ( ޑަބްލިޔުއެޗްއޯ ) އާއި ގުޅިގެން ދިރާސާއެއް ހެދުމުގެ މަސައްކަތް ކުރަމުން އަންނަކަމަށް މިނިސްޓަރު ހަލީލް ވިދާޅުވިއެވެ.
ހެލްތް މިނިސްޓްރީން އަމިއްލައަށް ކުރި ދިރާސާތަކުންވެސް ބައެއް ރަށްރަށުގައި ބައެއް ބާވަތްތަކުގައި ބަލިތައް ވަރަ|ށް ގިނަކަމަށައި އޭގެތެރޭގައި ކެންސަރު ހިމެނޭކަން މިނިސްޓަރު ހަލީލް ފާހަގަކުރެއްވިއެވެ.
ގައިން ގަޔަށް ނާރާ ބަލިތައް އިތުރުވާ ސަބަބު ދެނެގަތުމަށް ދިރާސާކުރަން މިހާރު ކުރަމުން އަންނަނީ ކޮންސަލްޓެންޓެއް ހޯދުމުގެ މަސައްކަތް ކަމަށާއި އެކަން ހަމަޖެހުމުން ވަރަށް އަވަހަށް މަސައްކަތް ފެށިގެންދާނެކަމަށް ހެލްތް މިނިސްޓަރު ހަލީލް ވިދާޅުވިއެވެ.
ރާއްޖޭގައި 5 ވައްތަރެއްގެ ކެންސަރު ޖެހޭ މީހުން ވަރަށް އާއްމުކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ ބުނެފައެވެ.
ރާއްޖޭގައި ކެންސަރުގެ އާއްމު ވައްތަރުތައް
- އުރަމަތީގެ ނުވަތަ ބްރެސްޓް ކެންސަރު
- ފުއްމޭގެ ކެންސަރު
- ލޭގެ ކެންސަރު
- ތައިރޮއިޑް
- ޕްރޮސްޓްރޭޓް ކެންސަރު
ދުނިޔޭގައި ދެވަނައަށް އެންމެ ގިނަ މީހުން މަރުވާ ބައްޔަކީ ކެންސަރު ބައްޔެވެ ރާއްޖޭގައި އަހަރެއްގެ މައްޗަށް މަރުވާ މީހުންގެ 17 އިންސައްތައަކީ ކެންސަރު ބަލީގައި މަރުވާ މީހުންކަމަށް އެޗްޕީއޭއިން ވަނީ ބުނެފައެވެ. އަދި ކެންސަރު ޖެހެން މަގުފަހި ވަނީ އެ މީހުންގެ ދިރިއުޅުމުގައި ގެންގުޅޭ ނުރަނގަޅު އާދަކާދަތަކުގެ ސަބަބުން ކަމަށް އެޗްޕީއޭއިން ބުނެއެވެ.
