އެ ޕާޓީން ސިލްސިލާކޮށް މިހާރު ބާއްވާ ޕެނަލް ޑިސްކަޝަންގެ ރޭގެ ބައްދަލުވުން ހާއްސަކުރީ ލާމަރުކަޒީ ނިޒާމަށެވެ.
އެ ޕެނަލް ޑިސްކަޝަންގައި ވާހަކަ ދައްކަވަމުން އެމްޑީޕީގެ އާ ނައިބު ރައީސް ހިސާން ހުސައިން ވިދާޅުވީ، މި ސަރުކާރުން އުޅެނީ ކައުންސިލްތައް ސައިޒު ކުރަން ކަމަށެވެ.
ކައުންސިލްތަކުން ހިދުމަތް ދިނުމަށް މަގުފަހިކޮށް ދިނުމަށް ދޭންޖެހޭ މާލީ ބާރުވެރިކަމާއި އިންތިޒާމުތައް ހަމަޖައްސައިދިނުމުގެ ބަދަލުގައި ފެންނަނީ ކައުންސިލްތަކުގެ އަތުގައި އޮތް އެއްޗެއް ސަރުކާރުން އަތުލާ މަންޒަރު ކަމަށް ހިސާން ވިދާޅުވި އެވެ.
ރައީސް ޑރ. މުއިއްޒު ވަނީ ތަފާތު އެކި ޕްލެޓްފޯމްތަކުގައި ކައުންސިލަރުން މަދުކުރުމަށް ބާރު އަޅުއްވާ ވާހަކަދައްކަވާފައެވެ. އެކަމަށް އިޝާރާތްކުރައްވާ ހިސާން ވިދާޅުވީ ކުދި ކުދި ރަށްތަކުގައި 5-7 ކައުންސިލަރުން ތިބުން މުހިންމު ނޫން ކަމަށް ރައީސް މުއިއްޒު ވިދާޅުވާ ސަބަބާއި މެދު ސުވާލު އުފެދޭ ކަަމަށެވެ. ސަރުކާރު ހިންގާ ނިޒާމަށް ބަލާއިރު ބައެއް ވުޒާރާތަކުގައި 125 މީހުން ސިޔާސީ މީހުން އެބަ ތިބި ކަމަށާއި އެހެންވީމަ ކައުންސިލްތަކުގެ ސައިޒް ކުޑަކުރުމުގެ ވާހަކަ ސަރުކާރުން ދެއްކުމަކީ އެ ނިޔަތާއި މެދު ސުވާލު އުފެދޭ ކަމެއް ކަމަށް ހިސާން ވިދާޅުވި އެވެ.
އާބާދީގައި 3،000 އަށް ވުރެ މަދުން މީހުން ދިރިއުޅޭ ރަށަކަށް ތިން ކައުންސިލަރުން ހޮވުމުން ފުދޭނެ ކަމަށް ރައީސް ޑރ. މުހައްމަދު މުއިއްޒު މިފަހުން ވަނީ ވިދާޅުވެފައި އެވެ.
ހޯމް މިނިސްޓްރީގެ ނާރެސް ޕޯޓަލް އާއި ކުރަނގި އޮޕަރޭޝަންގެ ދެ ވަނަ ފޭސް އިފުތިތާހުކުރުމަށް ދަރުބާރުގޭގައި ބޭއްވި ރަސްމިއްޔާތުގައި ރައީސް ވިދާޅުވީ، ކައުންސިލުތަކުން ދޭ ހިދުމަތްތަކުގެ ފެންވަރު ރަނގަޅު ކުރުމަށްޓަކައި ގިނަ ބަދަލުތަކެއް ގެންނަން ޖެހޭ ކަމަށެވެ. އެ ބަދަލުތައް ގެނައުމަށްޓަކައި ކަމާ ބެހޭ އިދާރާތަކުން މަސައްކަތްކުރަމުން އަންނަ ކަމަށް ކަމަށް ރައީސް ވިދާޅުވި އެވެ.
އެއްކަމަށް އެ މަނިކުފާނު ފާހަގަކުރެއްވީ ކައުންސިލުތަކުގައި ތިބޭ ކައުންސިލަރުންގެ އަދަދު މަދުކުރުމެވެ.
މި އުސޫލަށް ބަދަލުކުރެއްވިއްޖެ ނަމަ ކައުންސިލްތަކާއި އަންހެނުންނާއި ޒުވާނުންގެ ބައިވެރިވުން ވެސް އޮންނާނެ ކަމަށް ރައީސް މުއިއްޒު ވިދާޅުވި އެވެ.
ހަވަރު ބެރު ޕެނަލް ޑިސްކަޝަންގައި ވާހަކަދައްކަވަމުން އެމްޑީޕީގެ ލާމަރުކަޒީ ކޮމިޓީގެ މުގައްރިރު އަލީ ނިޔާޒު ވެސް ވިދާޅުވީ، ސަރުކާރުން ކުރަން އުޅޭ ކަމަކީ އިންތިހާބުކޮށްފައި ތިބި މީހުން މަދުކޮށް، އައްޔަން ކޮށްފައި ތިބި މީހުން ގިނަ ކުރުން ކަމަށެވެ. އެ މަސައްކަތް ވަރަށް އަވަހަށް ފަށާނެ ކަމަށް ބެލެވޭ ކަމަށް ނިޔާޒް ވިދާޅުވި އެވެ.
ނިޔާޒު ވިދާޅުވީ، މާލެ އިން އަތޮޅުވެރިންނަށް އަންގައިގެން، ރަށުގައި ހުންނަ ކަތީބު ކަންކަން ނިންމާ ނިޒާމު ކަމުނުދާ ކަމަށެވެ.
އޭނާ ވިދާޅުވީ، ދައުލަތުގެ ބަޖެޓު 30 ބިލިއަނަށް އަރާފައިވާއިރު، އޭގެ ތެރެއިން އެއް ބިލިއަން ރުފިޔާ 184 ރަށުގެ އިދާރީ ހިންގުމަށް ބޮޑު ނަމަ އޭގައި މައްސަލަތަކެއް އުޅޭ ކަމަށެވެ.
