ލަންކާގެ ބައެއް މީޑިއާތަކުން ރިޕޯޓުކޮށްފައިވާ ގޮތުގައި ސްރީލަންކާ ޕޮޑުޖަނާ ޕެރަމުނާ (އެސްއެލްޕީޕީ) ގެ ޓިކެޓުގައި ރިޔާސީ އިންތިހާބުގައި ނަމާލް ވާދަކުރާނެކަން މާދަމާ އިއުލާންކުރާނެ އެވެ. އެ ޕާޓީގެ ޓިކެޓުގައި މީގެކުރިން ވާދަކުރަން ނިންމާފައި އޮތީ މަހުޖަނު، ދަމްމިކާ ޕެރޭރާ ނަމަވެސް އޭނާ ވަނީ ނަން އަނބުރާ މިހާރު ގެންގޮސްފަ އެވެ.
ގާނޫނީ ވަކީލެއް ކަމަށްވާ ނަމާލް ގާނޫނު ހަދާ މަޖިލީހަށް އިންތިހާބުވީ 2010 ވަނަ އަހަރު ހަމްބަންޓޯޓާ ޑިސްޓްރިކްޓަށް ވާދަކޮށެވެ. އޭނާގެ ބައްޕާފުޅު ރައީސްކަމަށް ވަޑައިގަތީ ހަމްބަންޓޯޓާގެ މެންބަރުކަން 16 އަހަރު ކުރެއްވުމަށް ފަހު 2005 ވަނަ އަހަރު އެވެ.
ރައީސަކު އިންތިހާބުކުރުމަށް ބާއްވާ އިންތިހާބު ބާއްވަން ހަމަޖެހިފައިވަނީ އަންނަ މަހުގެ 21ވަނަ ދުވަހެވެ. ސިޔާސީ މަސްރަހު ދިރާސާކުރާ ފަރާތްތަކުން ލަފާކުރާ ގޮތުގައި މި އިންތިހާބުން މޮޅުވާ ކެންޑިޑޭޓަކާއެކު ޔަގީންވެގެންދަނީ އެ ގައުމުގެ އިގްތިޞާދު ހަަމަމަގަށް އެޅުމަށް ޓަކައި ތަންފީޒުކުރާނެ ކަންކަމާއި ސިޔާސަތު ބައްޓަންވާނެ ގޮތެވެ.
ލަންކާގެ ރިޔާސީ އިންތިހާބުގައި ގިނަ އަދަދެއްގެ ކެންޑިޑޭޓުން ވާދަކުރެ އެވެ. އޭގެތެރޭގައި ލަންކާގެ މިހާރުގެ ރައީސް ރަނިލް ވިކްރަމްސިންހަ އާއި އެގައުމުގެ އިދިކޮޅު ލީޑަރު ސަޖިތު ޕްރޭމަދާސާ ހިމެނެ އެވެ.
