ޕީއެންސީގެ ޖަގަހައިގައި މިރޭ ބޭއްވި ޖަލްސާގައި އަބްދުއްރަހީމް ވިދާޅުވީ ރައީސް ޔާމީން ވެރިކަމަށް ވަޑައިގެންނެވިއިރު، އެމަނިކުފާނުގެ އެކައުންޓުތަކުގައި އެއް ލައްކަ ރުފިޔާ ވެސް ނެތް ކަމަށާއި ނަމަވެސް ވެރިކަމުން ފައިބައިވަޑައިގެންނެވިއިރު، އެކައުންޓުގައި 500 މިލިއަނުން ފައިސާ ހުރި ކަމަށެވެ. އަދި އެ ފައިސާއަކީ ކިހިނެއް ހޯދި ފައިސާއެއްތޯ އަބްދުއްރަހީމް ވަނީ ސުވާލު އުފައްދާފައެވެ.
ޔާމީނަށް ވަރަށް ބޮޑަށް ފާޑު ވިދާޅުވަމުން އަބްދުލްރަހީމް ވަނީ ރައްދު ދޭން ވެސް ޖަދަލުކުރަން ވެސް ތިބީ ތައްޔާރަށް ކަމަށާއި ސިޔާސީ ހަޔާތް އެކީ ހޭދަކުރީ ޔާމީނާއެކު ކަމަށްވީ ނަމަވެސް 18 ވަނަ ރައްޔިތުންގެ މަޖިލީހުގައި ޔާމީން ދެއްވީ ލަގާއެއް ކަމަށްވެސް ވިދާޅުވެފަ އެވެ. އެގޮތުން އެ މަޖިލީހުގެ ނައިބު ރައީސްކަން އޭނާ އަށް ގެއްލުވާލީ ޔާމީން ކަމަށާއި ހިޔާނާތްތެރިންނަކީ އެއީ ކަމަށްވެސް އަބްދުލްރަހީމް ވިދާޅުވި އެވެ.
މިރޭ ބޭއްވި ޕީއެންސީ ޖަގަހަ ޖަލްސާގައި އަބްރުއްރަހީމް ވާހަކަދައްކަވަނީ
މި ޖަލްސާގައި ވާހަކަ ދެއްކެވި ޕީއެންސީގެ ޕީޖީ ގްރޫޕުގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު ވެސް ވަނީ ޔާމީން އަތުގައި ހުންނާނެ ފައިސާގެ ތަފްސީލު ދެއްވާފައި އެވެ. އެގޮތުން ފަލާހް ވިދާޅުވީ ކުރީގެ ރައީސް އަބްދުﷲ ޔާމީނުގެ ބޭންކު އެކައުންޓުގައި ދައުލަތުގެ ބަޖެޓާ އެއްވަރަށް ފައިސާ އެބަހުރި ކަަމަށް ވިދާޅުވެ، އެ މަނިކުފާނުގެ މައްޗަށް ބޮޑެތި ތުހުމަތުކުރައްވައިފަ އެވެ.
ޔާމީނު ހެންވޭރުން ގަތް ބިމުގައި އަޅާފައިވާ އިމަރާތާމެދު ވެސް ފަލާހު ސުވާލު އުފެއްދެވި އެވެ. މާލޭގައި އެވަރުގެ ބިމެއް 12 ބުރިއަށް އިމާރާތް ކުރެވޭނީ ގާތްގަނޑަކަށް 80 މިލިއަން ރުފިޔާއަށް ކަމަށާއި ލޯނެއް ނުނަގައި އެފަދަ އިމާރާތެއް ކުރާނަމަ ރައްޔިތުންވެސް ސުވާލު އުފައްދާނެ ކަމަށް އޭނާ ވިދާޅުވި އެވެ.
