އެގޮތަށް ނިންމީ ބަންގްލަދޭޝްގެ ރައީސް މުހައްމަދު ޝަހާބުއްދީނާއި އަސްކަރިއްޔާގެ އިތުރުން ހަސީނާ މަގާމުން ބޭރުކުރުމަށް ބޮޑެތި މުޒާހަރާތަކެއް ރޭވުމުގައި އިސްކޮށް އުޅުނު ދަރިވަރުންގެ މެދުގައި މަޝްވަރާތަކެއް ކުރުމަށް ފަހު އެވެ.
ބަންގްލަދޭޝްގެ ރައީސް މުހައްމަދު ޝަހާބުއްދީންގެ ތަރުޖަމާނު ޖޮއިނަލް އަބެޑިން ވިދާޅުވީ އިދިކޮޅު ލީޑަރުންނާ އެކު ކުރި މަޝްވަރާތަކަށް ފަހު ވަގުތީ ސަރުކާރު ލީޑްކުރަން ޔޫނުސް ހަމަޖައްސަން ނިންމާފައިވާ ކަމަށެވެ.
އުމުރުން 84 އަހަރުގެ ޔޫނުސް އާއި އޭނާގެ ގްރަމީން ބޭންކަށް 2006 ވަނަ އަހަރުގެ ނޮބެލް ސުލްހައިގެ އިނާމު ލިބުނީ ބަންގްލަދޭޝްގެ ފަގީރު ހިސާބުތަކުގެ މީހުންނަށް ކުދި ލޯނު ދީގެން އެ މީހުން ފަގީރުކަމުން ސަލާމަތް ކުރުމަށް ކޮށްފައިވާ މަސައްކަތްތަކަށެވެ. ނަމަވެސް ޔޫނުސްގެ މައްޗަށް ކޯޓުން ވަނީ ވައްކަމުގެ ތުހުމަތުކޮށްފައެވެ. އެ ތުހުމަތުތަކަށް ޔޫނުސް އިންކާރުކުރެ އެވެ.
ބަންގްލަދޭޝްގެ ބޮޑުވަޒީރުކަމުން ހަސީނާ އިސްތިއުފާ ދެއްވީ ވަޒީފާގެ ކޯޓާގެ މައްސަލައިގައި ދަރިވަރުން ކުރަމުންދިޔަ މުޒާހަރާތައް ކޮންޓްރޯލުން ނެއްޓުމާ ގުޅިގެންނެވެ. އިސްތިއުފާ ދެއްވުމަށްފަހު، ގައުމު ދޫކުރައްވައި ހަސީނާ ވަޑައިގަތީ އިންޑިއާ އަށެވެ.
