މުސްލިމުންނާއި ދެކޮޅަށް ޔޫކޭގައި ސިލްސިލާ ހަމަނުޖެހުންތައް ހިންގަމުން އަންނަނީ ސައުތްޕޯޓުގައި ހިނގި ކުޑަކުދިންގެ ޑާންސް އަދި ޔޯގާ ކްލާހެއްގެ ދަރިވަރުންތަކަކަށް ވަޅިން ހަމަލާދިނުމުން ކުޑަ ކުދިންތަކެއް މަރުވުމާއި ގުޅިގެންނެވެ.
ފޮރިން މިނިސްޓްރީން ނެރުނު ބަޔާނެއްގައި ބުނީ މިދިޔަ ޖުލައި މަހުގެ 29 އިން ފެށިގެން އިނގިރޭސިވިލާތުގައި ހިނގަމުންދާ ހަމަނުޖެހުންތަކާ ގުޅިގެން، އެ ޤައުމުގައި ހުންނަ ދިވެހި ހައިކޮމިޝަނުން ދަނީ ވަރަށް ގާތުން އެކަން ބަލަމުންކަމަށެވެ.
މިހާލަތާ ގުޅިގެން، 100 އަށްވުރެ ގިނަ މުޒާހަރާތައް ރޭވިފައިވާކަމުގެ މަޢުލޫމާތު ލިބިފައިވާތީ، އިނގިރޭސިވިލާތުގައި ދިރިއުޅޭ އެންމެހައި ދިވެހި ރައްޔިތުންނާއި، އެ ޤައުމަށް ޒިޔާރަތްކުރާ ދިވެހި ފަތުރުވެރިންގެ ރައްކާތެރިކަމާއި ސަލާމަތަށް ހާއްސަ ސަމާލުކަމެއް ދިނުމަށް ފޮރިން މިނިސްޓްރީން ވަނީ އިލްތިމާސްކޮށްފައެވެ.
އިނގިރޭސިވިލާތުގައި ހިނގަމުންދާ ހަމަނުޖެހުންތަކާ ގުޅިގެން އެއްވެސް އެހީތެރިކަމެއް ބޭނުންވާނަމަ އިނގިރޭސިވިލާތުގައި ހުންނަ ދިވެހިރާއްޖޭގެ ހައިކޮމިޝަންގެ ނަމްބަު 02072242135(44+) ގުޅުމަށް ފޮރިން މިނިސްޓްރީން އެދެއެވެ. އަދި އިނގިރޭސިވިލާތުގައި ދިރިއުޅޭ ދިވެހިން [email protected] މެދުވެރިކޮށް ހައި ކޮމިޝަނުގައި ރަޖިސްޓަރީވުމަކީ ނުހަނު ބޭނުންތެރިކަމެއްކަމުގައިވެސް އެ މިނިސްޓްރީން ބުނެއެވެ.
