ވިޒިޓް މޯލްޑިވްސް ޕްރޯ 2024 އަކީ ބޮޑީބޯޑިން އައިބީސީ ވޯލްޑް ޓުއާގައި ހިމެނޭ އެއް ކޮމްޕޮނެންޓެވެ. މި މުބާރާތް ކުރިއަށްދަނީ ހެންވޭރު ވަރުނުލާ ރާޅުގަނޑުގައެވެ. ފައިނަލް ހީޓުގައި ކެނެރީ އައިލެންޑްސް އަށް ނިސްބަތްވާ ސޮލިވެރޭސް ޗެމްޕިއަންކަން ހޯދީ މިދިޔަ އަހަރުގެ ޑްރޮޕްނީ ބައިން ޗެމްޕިއަންކަން ހޯދި ހަވާއީގެ ޑޭވް ހުބާޑް އާ ވާދަކޮށް ކުޑަ ތަފާތަކުން ކުރި ހޯދައިގެންނެވެ. ފައިނަލް ހީޓުގައި ހުބާޑް، ޖުމްލަ 13.5 ޕޮއިންޓް ހޯދި އެވެ. ސޮލިވެރޭސް ކުރި ހޯދީ 13.75 ޕޮއިންޓް ހޯދައިގެންނެވެ.
މިއަހަރުގެ އަންހެން ބައިގެ ޗެމްޕިއަންކަން ހޯދީ ފައިނަލް ހީޓުގައި ޖުމްލަ 12.75 ޕޮއިންޓް ހޯދި ޖަޕާނުގެ ނަމިކާ ޔަމަޝިތާ އެވެ. އޭނާއާ ވާދަކުރި، އެގައުމުގެ ސާރީ އޮހާރާ އަށް ލިބުނީ 12 ޕޮއިންޓެވެ.
މިއަހަރުގެ މުބާރާތުގެ ތިން ކެޓެގަރީގައި 14 ގައުމަކުން 86 ބޮޑީބޯޑަރުން ވާދަކުރި އެވެ. އޭގެ ތެރޭގައި ރާއްޖޭގެ 15 ބޮޑީބޯޑަރުން ހިމެނެ އެވެ.
