ނޫސްވެރިޔާ އަހްމަދު ރިލްވާން ގެއްލުނީ 2014 ވަނަ އަހަރުގެ އޮގަސްޓްމަހުގެ 8 ވަނަދުވަހުއެވެ. އެ ހާދިސާއަށްް 10 އަހަރު ފުރުމާއި ދިމާކޮށް ބައިނަލްއަގުވާމީ ބޮޑެތި ޖަމިއްޔާތަކާއި ރާއްޖޭގެ ޖަމިއްޔާތައް ހިމެނޭ ގޮތަށް 12 ޖަމިއްޔާއެއް ގުޅިގެން މިއަދު ވަނީ ނޫސް ބަޔާނެއް ނެރެފައެވެ.
އެ ބަޔާނުގައި ވަނީ ރިލްވާން ގެއްލުވާލި މައްސަލައިގައި ތުހުމަތުވާ ބައެއް މީހުންނަށް މި ސަރުކާރުގައި އިސް މަގާމުތަކެއް ދީފައިވާތީވެ، އެ ކަމުގެ ކަންބޮޑުވުން ފާޅުކޮށްފައެވެ. އަދި އެމީހުން މަގާމުން ސަސްޕެންޑްކޮށް މިދިޔަ ސަރުކާރު އުފެއްދި މަރު ކޮމިޝަންގެ އޮޑިޓެއް ހެދުމަށް ރައްޔިތުންނަށް މަޖިލީހަށް އެ ބަޔާނުގައި ވަނީ ގޮވާލާފައެވެ.
މީގެ އިތުރުން މަރުވެފައިވާ މީހުންނާއި ގެއްލިިފައިވާ މީހުންގެ މައްސަލަތައް ބެލުމަށް މިދިޔަ ސަރުކާރުގައި ހެދި ކޮމިޝަން އެ ދައުރު ނިމި އުވާލިއިރު އެ ވައުދު ފުރިހަމަކުރުމަށް ވީ ކަމެއް ފެންނަން ނެތްކަމަށްވެސް އެ ބަޔާނުގައިވެއެވެ.
އަދި ކޮމިޝަނުން ތަހުގީގުކޮށް ދައުވާކުރި މީހުންގެ މައްޗަށް ހެއްކެތް ނެތިގެން އެ ދައުވާ ކްރިމިނަލް ކޯޓުން ބޭރުކޮށްލުމުން އެ ނިންމުން ދައުލަތުން އިސްތިއުނާފުކޮށްފައި ނުވާކަންވެސް ޖަމިއްޔާތަކުން ނެރުނު ބަޔާނުގައި ވަނީ ފާހަގަކޮށްފައެވެ. އަދި ކޮމިޝަނުން ހޯދި ހޯދުންތައް ހާމަކުރުމަށް މި ސަރުކާރުން ދެކޮޅު ހާދާފައިވާތީ އެކަންވެސް ވަނީ ބަޔާނުގައި ފާހަގަކޮށްފައެވެ.
ނޫސްވެރިޔާ އަހްމަދު ރިލްވާނަށް ޝަހާދަތްލައިދީ ކަރުބުރިކޮށް މަރާލީކަމަށާއި، އެކަމުގައި އަމަލީގޮތުން ހަރަކާތްތެރިވި ހަ މީހަކު ސީރިއާއަށް ދިޔަފަހުން މަރުވެފައިވާ ކަމަށް މަރު ކޮމިޝަނުން ކުރިން ވަނީ ބުނެފައެވެ.
