ފެނަކައިން މިއަދު ވަނީ ހދ. ކުޅުދުއްފުށްޓާއި ހއ. ދިއްދޫއާއި ފުވައްމަލަކު އިންޖީނުގެއާއި ށ.މާއުނގޫދޫގެ އޮފީސް އިމާރާތުގެ މަސައްކަތް ނިންމާނެ ބަޔަކު ހޯދުމަށް އިއުލާންކޮށްފައެވެ.
ފެނަކައިން ބުނީ އެ މަސައްކަތް ކޮށްދޭން ޖެހޭނީ އެ ކުންފުނިން ދޭ ކުރެހުމާއި ބީ.އޯ.ކިޔު އަދި މަޢުލޫމާތާއި އެއްގޮތަށް އިންޖީނު ގެތަކާއި އޮފީސް އިމާރާތްކުރުމުގެ ނުނިމި ހުރި އެންމެހާ މަސައްކަތްތައް އަމިއްލަ ތަކެތީގައިކަމަށެވެ.
ނުނިމި ހުރި ބައެއް އިންޖީނުގެއާއި އޮފީސް އިމާރާތްތައް ހަދާނެ ބަޔަކު ފެނަކައިން ހޯދަން މި އިއުލާންކުރީ އެ މަސައްކަތްތަކަށް ކޮންޓްރެކް އުސޫލުން އެ ކުންފުންޏަށް ނަގާފައިވާ މުވައްޒަފުން ވަކިކުރަން ނޯޓިސް ދިނުމަށްފަހުއެވެ. ފެނަކައިން ވަނީ 731 މުވައްޒަފުން ވަކިކުރަން ނޯޓިސް ފޮނުވާފައިވެއެވެ. އަފި އެ ނޯޓިސްގެ މުއްދަތު މިމަހުގެ 15 ވަނަ ދުވަހަށް ހަމަވާނެކަމަށް އެ ކުންފުނިން ވަނީ ބުނެފައެވެ.
މި މުވައްޒަފުން މަދުކުރުމުން ކުންފުންޏަށް މަހެއްގެ މައްޗަށް 7 މިލިއަނާއި 9 މިލިއަން ރުފިޔާއާ ދެމެދުގެ އަދަދެއް ސަލާމަތް ކުރެވޭނެކަމަށްވެސް އެ ކުންފުނިން ވަނީ ބުނެފައެވެ.
ފެނަކައިން ބުނީ އެ ކުންފިންނަށް މީހުން ނަގައިގެން ކުއްޔަށް ތަކެތި ނަގައިގެން މި މަސައްކަތް ކުރުމުގެ ބަދަލުގައި ބަޔަކާއި ހަވާލުކޮށްގެން ކުރުމުން ކުންފުނިން ކުރަންޖެހޭ ހަރަދުތައް ކުޑަވާނެކަމަށެވެ.
