ރާއްޖެއަށް ކުރައްވާ ތިން ދުވަހުގެ ރަސްމީ ދަތުރުފުޅުގެ ތެރެއިން ޖައިޝަންކަރު ގަސް އިންދަވާފައިވަނީ ލޮނުޒިޔާރަތް ޕާކުގައެވެ. ހެނދުނު ބޭއްވި ރަސްމިއްޔާތެއްގައި ޖައިޝަންކަރު އިންދެވީ ކާމަރަނގަ (ސްޓާ ފުރުޓް ) ގަހެކެވެ. މި ގަސް އިންދާވެދެއްވީ އެމަނިކުފާނާއި ރާއްޖޭގެ ހަރިޖީ ވަޒީރު މޫސާ ޒަމީރެވެ.
މި ރަސްމިއްޔާތުގައި ތިމާވެއްޓާއި ބެހޭ ވަޒީރު ތާރިގް އިބްރާހީމާއި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރާއި މާލޭ ސިޓީގެ މޭޔަރު އާދަމް އާޒިމް ބައިވެރިވެޑައިގަތެވެ.
މި ގަސް އިންދެވުމަށްފަހު ޖައިޝަންކަރުގެ އެކްސްގައި ކުރެއްވި ޕޯސްޓެއްގައި ވިދާޅުވީ މީ ދެމެހެއްޓެނިވި މުސްތަގުބަލަކަށްކުރާ މަސައްކަތާއި އިންޑިއާއި ރާއްޖެއާ ދެމެދު އޮތް ގާތް އެކުވެރި ގުޅުން ދެމިގެންދާ ރަމްޒެއް ކަމަށެވެ.
ޖައިޝަންކަރު އިންދެވި ގަހާއި ބެހޭ މައުލޫމާތު ހިމެނޭ ބޯޑެއް
ދުނިޔޭގެ ތިމާވެށީ ދުވަހުގެ މުނާސަބަތާ ގުޅިގެން ރައީސް ޑރ. މުހައްމަދު މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދު ފަސް މިލިއަން ގަސް އިންދުމުގެ މަޝްރޫއު އިފްތިތާހު ކުރީ މިދިޔަ ޖޫން މަހުގެ 5 ވަނަ ދުވަހުގައެވެ.
ޖައިޝަންކަރު ރާއްޖެއަށް ކުރައްވާ މި ދަތުރުފުުގައި މިއަދު ވަނީ އިންޑިއާގެ އެހީގައި ރާއްޖޭގައި ނިންމާފައިވާ ފެނާއި ނަރުދަމާގެ 28 މަޝްރޫއެއް ދިވެހި ސަރުކާރާއި ހަވާލުކޮށްދެއްވާފައެވެ.
